KUQALILE ukuvalwa kwemigwaqo esondelene neSandton Convention Centre lapho okuzobanjelwa khona ingqungquthela yeBRICS.
Imigwaqo ivalwe kusukela ngeSonto kuze kube yiSonto elizayo ngo-Agasti 26.
Kunxuswa abashayeli ukuba basheshe bahlele izindlela zabo ikakhulukazi labo abasebenzela eSandton nabahlala khona ukuze bangaphazamiseki kakhulu kuleli sonto.
Imigwaqo evaliwe uMaude kusukela ku5th kuya kuWest. U-Alice nemigwaqo engenela ku-5th noWest nayo izobe ivaliwe ngoba isondelene nendawo okuzobanjelwa kuyo ingqungquthela.
Ingqungquthela iqala ngoLwesibili izophela ngoLwesine. Ngokusho kukahulumeni, konke sekumi ngomumo ukwamukela izihambeli ezibuya kwamanye amazwe.
Nabaholi bamazwe ahlukene sebeqalile ukutheleka kuleli. Namuhla emini uNgqongqoshe wezeMfundo eyisiSekelo, uNkk Angie Motshekga, wamukele Lazarus Chakwera waseMalawi esikhumulweni sesindiza, iLanseria.
