IQEMBU loMkhonto Wesizwe Party lidlulise amazwi enduduzo emindenini yamalungu alo ashone engozini enyantisa igazi eyenzeke eSambaba, eKranskop ngoMgqibelo.
Ngokwesitatimende saleli qembu, ayisithupha amalungu ashone ngesikhathi itekisi abebehamba ngayo iginqika yokheleka ngomlilo ngo-11 ekuseni.
Kuthiwa amalungu eMK abelibangise KwaDakw’udunuse, eNkandla emzini womholi weqembu uJacob Zuma, emcimbini wokuhlonipha unkosikazi wakhe wokuqala uNkk Sizakele MaKhumalo Zuma.
“Ngeke sikwazi ukubuchaza ubuhlungu esibuzwayo ngalesi simo esisehlele. Sidlulisa amazwi enduduzo emindenini nasezihlotsheni zabashonile.”
Leli qembu lifisele abasindile ukululama okusheshayo esibhedlela.