UNGQONGQOSHE wezeMpilo KwaZulu-Natal uNksz Nomagugu Simelane ehambisana nephini likangqongqoshe wezaseKhaya uMnuz Njabulo Nzuza bahambele esibhedlela iGeneral Justice Gizenga Mpanza Regional ngaphansi kwesifunda iLembe, beyonikeza izingane ezizelwe ngalolu suku lukaKhisimusi izipho.
Zingu47 izingane ezizalwe ezibhedlela ezahlukene KwaZulu-Natal namuhla, abafana bangu24 kanti amantombazane angu23.
Ingane yokuqala yentombazane ibelethwe esibhedlela iKing Dinuzulu phakathi kwamabili, izalwa wumama oneminyaka engu36 ubudala.
UNgqongqoshe uzwakalise okukhulu ukukhathazeka ngokwanda kwesibalo somama abasebancane njengoba omncane kunabo bonke obelethe namuhla uneminyaka engu15, ubelethele esibhedlela iPrince Mshiyeni Memorial.
Ophongolo, iphini lemeya uMhlonishwa BJ Thwala unikezele ngezipho zikaKhisimusi kubazali babantwana abahlanu abazalwe namuhla ngo12namuhla ebusuku esibhedlela iTshelejuba.
