UMSAKAZI weVuma FM, owenza uhlelo lwasemini olubizwa ngeCruise with Jacinta, unyelwe inyoni esandleni njengoba eyomela elakuleli e-United States of America.
UJacinta Ngobese akawuvali umlomo ngale ngqayizivele yethuba.
“Angikholwanga ngesikhathi bengithinta bengazisa lezi zindaba. Ngicabanga ukuthi bathokozela nemibono yami ezinkundleni zokuxhumana. Okusho ukuthi lingithandile iphesheya ngoba ngisanda kuya khona. Okuhle ukuthi ngiya kwelinye izwekazi, hhayi lapho ebengikhona,” kuchaza le ntokazi eyintandokazi kubalaleli balesi siteshi somsakazo.
Nasemsakazweni uhlelo lwakhe luhamba phambile, unekhono lokususa inkulumo-mpikiswano kumbe aqhamuke nezihloko ezihlabahlosile. Uhlelo lwakhe lungolunye lwezinhlelo ezihamba phambili kulezo ezingena ngo-9-12.
UJacinta ungomunye wabasakazi abangesabi ukuveza imibono yabo esidlangalaleni.
Njengoba ehamba uzobheka isihloko esithinta ukusebenza kwabezindaba kanti kulindeleke ukuthi avakashele namanye amadolobha akuleli lizwe. Lokhu kuvezwe yincwadi ethunyelwe nguJacyn A. Cole omele elaseMelika eThekwini.