UNEMIBUZO engaphenduleki umndeni wakwaCC eMlaza emva kokuphambana kwezingane esibhedlela ePrince Mshiyeni Memorial ngenyanga eyedlule.
Ngokusho komndeni, unina wosana, oneminyaka engu-17 owakhishwa esibhedlela nosana 'lwakhe' ngoMeyi 9, wabuye wathola ucingo ngoMeyi 12 oluthi akabuye nalo esibhedlela.
Ugogo wosana, uNksz Phumzile Hlongwana uthi kwathi uma ifika esibhedlela indodakazi yakhe, kwangena olunye ucingo kuyena, luthi akalandele naye.
"Ngithe uma ngifika khona, ngathola sebemphucile ingane, sebengazisa ukuthi, yaphambana neyomunye umama ona-17, ngakho kuzolindwa imiphumela yolibofuzo, ezofakazela lokhu," kusho uNksz Hlongwana.
Uthi bathe besalinde ukuthi kuphele izinsuku ezingu-15 kubuye imiphumela, baphinde bathola olunye ucingo luthi mabeze esibhedlela.
Uthi banikela khona, bafika batshelwa ukuthi usana olwalunikwe indodakazi yakhe akusilo olwayo, kwathiwa olwalunikwe omunye umama, yilona okungolwakhe.
"Iyodwa imiphumela eyayikhona, eyayikhombisa ukuthi akusilo usana ayekade ephume nalo esibhedlela," kusho uNksz Hlongwana.
Uthi okwaba buhlungu kunakho konke wukuthi usana olwalukade luthathwe ngomunye umama, batshelwa ukuthi yilona olwendodakazi yakhe. Batshelwa ukuthi lugcine ngokushona khona ngaphakathi esibhedlela emva kokuthathwa kwazo zombili konina.
"Ayikho into ephathekayo abasikhombisa yona ukuthi ngolwakhe ngempela, ngoba ayikho imiphumela esakhonjiswa yona efakazela lokho," kusho uNksz Hlongwana.
Uthi miningi imibuzo abanayo kodwa abangazitholi izimpendulo zayo.
"Njengokuthi kwenzeka kanjani ukuthi izingane ezimbili zibe namabhande ezandla omama oyedwa, zibe zingesiwona amawele," kusho uNksz Hlongwana.
Uthi baphinde bazibuze ukuthi ziphambana kanjani izingane ezizalwe zashiyana ngehora, zizalwa emawodini amabili angefani.
"Yonke le mibuzo siyibuzile kodwa asizange sizithole izimpendulo zayo," kusho uNksz Hlongwana.
Uthi okunye okubaphathe kabi wukuthi unesi obelethisayo bebembona njalo uma beya esibhedlela, eqhubeka nokusebenza sengathi akenzanga lutho olungafanele.
Unina wosana akakwazanga ukukhuluma neSolezwe ngenxa yeminyaka yakhe yobudala nokuthi unina wakhe uveze ukuthi akekho esimweni esikahle, usehlale ezivalele ekamelweni futhi ehlezi yedwa emva kokulahlekelwa wusana.
UMnyango wezeMpilo ukhiphe isitatimende, wathi udaba seluphenyiwe nezinyathelo sezithathiwe kwabathintekayo.
“Lolu daba lusetshenzwa ngendlela enobunyoninco ngoba lubucayi, ikakhulukazi ngoba abazali bezinsana bobabili baneminyaka engaphansi kwengu-18,” kusho isitatimende.
Kuso kuvela nokuthi yize umnyango ungavumelekile ukuthi udingide izindaba ezibandakanya iziguli zawo, kodwa wungakuveza ukuthi ubuholi besibhedlela buyaxhumana nezinhlaka ezithintekayo.
“Siyafuna ukukuveza ukuthi isibhedlela sinikele ngokuthi izinhlaka zombili ezithintekayo zinikezwe usizo lokwelashwa ngokomqondo, kodwa kwaba nenkinga yokuthi basematasa nezivivinyo,” kusho isitatimende.
Imiphumela yolibofuzo lokuqala yadingidwa nomama bobabili nemindeni yabo, kodwa umndeni kanina wosana oludlulile emhlabeni, waphinde wacela ukuthi kwenziwe elunye ulibofuzo, imiphumela yakhona kulindeleke ukuthi ibuye ngoJuni 21.
UMnyango uthi kubalulekile ukubalulekile ukubalula ukuthi esibhedlela kuzalwa izingane eziphakathi kuka-1100 no-1400 njalo ngenyanga, okusenza silale isibili ezweni lonke ngokuletha izingane eziningi emhlabeni.
Umnyango uthe isibhedlela sabo sibe ngesinye sezikhahlanyezwe yizikhukhula, ezenzeke ngesikhathi esithi asifane nokwenzeke ngaso isehlo.