IBANDAKANYEKE engozini yomgwaqo i-ambulensi yabakwa-Emergency Medical Rescue Services (EMRS) ebihambisa esibhedlela owesifazane onezinyanga eziyisikhombisa ekhulelwe.
Kuthiwa ingozi yenzeke emgwaqweni u-Oakford ngaseVerulam ngeSonto emini.
Okhulumela abezimo eziphuthumayo enkampanini yonogada, iReaction Unit South Africa (Rusa), uMnuz Prem Balram, uthe babizelwe endaweni yesehlakalo ngo-14:13 emini.
UBalram uthe endaweni yengozi bafice i-ambulensi ebikade inowesifazane oneminyaka engu-27 futhi enezinyanga eziyisikhombisa ekhulelwe.
“I-ambulensi ibisendleleni isuka esibhedlela Osindisweni ihambisa owesifazane okhulelwe kwesinye isibhedlela iMahatma Gandhi. Ishayise iveni iMitsubishi Triton,” kusho uBalram.
Uqhube wathi babikelwe wumshayeli weveni ukuthi beyikade ihamba emgwaqweni kanti uzoyifaka egiyeni lokupaka ngephutha okwenze yama ngqi kungazelele muntu.
Kuthiwa iveni ibilayishe izingane ezineminyaka ephakathi kwemine kuya kweyisikhombisa ngemuva esikhenkeni seveni ngesikhathi i-ambulensi iyishayisa.
UBalram uthe kube wukutubeka nje akekho olimale kakhulu.