LIHLOSE ukwenza konke okusemandleni alo ukusebenzisa umthandazo ukuze kudambe ubugebengu eNanda, ibandla labasindisiwe iShepherd’s Heart Ministries.
Lokhu kudalulwe ngumholi walo obuye abe ngudokotela uMfundisi Benzi Gumede. Leli bandla lingaphansi kwe-Apostolic Faith Mission of Southern Africa (AFMSA).
Leli bandla linesizinda endaweni yaseTafuleni, eNanda, okuyilapho ubugebengu obudla khona lubi.
"Ukukutshela iqiniso nje, alukho uhlobo lobugebengu olungekho kuleya ndawo. Kubulawa abantu kuyebiwa futhi kuyagqekezwa. Kwenziwa yonke into ongayicabanga engalungile emphakathini esikuwona,'' usho kanjena umfundisi.
Uqhube wathi bakholwa ukuthi uNkulunkulu unamandla ngaphezulu kwesimo abazithola bebhekene naso eNanda.
Uveze ukuthi basanda kuba nendumezulu yenkonzo kuyona le ndawo lapho obekuzokhulekelwa khona zonke izinhlobo ezahlukene zezinkinga ezibonakala zikhungethe le ndawo.
Uthe njengebandla likaNkulunkulu abagcini nje ngokushumayela kuphela kodwa bayazibandakanya nezinto ezenzeka emphakathini abakuwona.
Uthe yingakho bekubeka eqhulwini ukubaluleka kokuthi kube khona abakwenzayo ngenhloso yokulwa nobo ugebengu obudla lubi kule ndawo.
"Sikholwa ukuthi uma sonke singabambisana nakanjani singakwazi ukuthi siyinqobe impi kasathane ebonakala idla lubi lapha eNanda,'' usho kanje umfundisi.
Uthe minyaka yonke bazozijwayeza ukuthi bazihlele izinkonzo zokulwa nobugebengu kule ndawo.
Mayelana nebandla aliholayo, uthe likholelwa kakhulu ekushumayeleni uNkulunkulu ngeqiniso futhi likhuthaza kakhulu imfundo kubona bonke abantu abasha abakulona.