AWUZANGE akugqize qakala ukusatshiswa, amanye amalungu omphakathi aKwaNyavu, eMkhambathini, njengoba eqhubekile nokuyovota yize kuqale kwagqoza ukufika kwawo ngezikhathi zasemini.
Amalungu omphakathi akhulume neSolezwe athe yize enovalo kulandela ukuqhuma kwezibhamu ngendlela engajwayelekile ngeSonto ebusuku, emva kokuvalwa kwezikhungo njengoba bekuphothulwa uhlelo lokuvota ngokuyisipesheli, kodwa azolisebenzise ilungelo labo lokuvota.
Ngesikhathi Isolezwe lifika ezikhungweni okuke kwananyatheliswa khona amaphepha asongela abazovota ngokukwenzakaliswa, esiseNobhala High nesisesikoleni samabanga aphansi Inkanyezini Primary, bekunemithonseyana ebilokhu ifika izovota.
Obhekelele ukusebenza kwekhomishini yokhetho ezikhungweni ezisendaweni, uMnuz Silo Ngubane, uthe eNkanyezini okuyisikhungo sokuvota esikhulu endaweni, bancane abebesafikile ukuzovota emini, iningi labo obekungabantu abadala, okuthe ngokushona kwelanga isibalo sakhuphuka.
Ngesikhathi sokushicilela, kubavoti abangu- 1 902 ababhalisele ukuvota esikhungweni bebasabalelwa ku-600 kuphela asebevotile kanti uNgubane uveze ukuthi iningi labo lifike ntambama.
“Besinokwesabela ukuthi uma abantu bengaphumi emini ukuzovota ngenxa yokwethuka, kuzoba nzima kakhulu uma sekuhwalele kodwa sibabona sebeqala ukutheleka. Zimbili izikhungo ezithinteke kakhulu, iseNobhala naseNkanyezini njengokusondelana kwazo. Ezinye okuyiLion Park naseMbuyi, sithole imibiko yokuthi khona ukuvota bekuqhubeka kahle abantu befika,” kusho uNgubane.
Uthe abavotisayo bakhona endaweni obekubikwe ukuthi sebeyesaba, babuyile baqhubeka nokusebenza.
Esikhungweni esisenkulisa eNtobeko, umphakathi ubusathuswe wukushiswa kwelinye igumbi okuse lingqongqiswe ngomlilo. Nakuba kunjalo, ubonakale uphuma.
Ilungu lomphakathi elikhulume neSolezwe elingathandanga ukudalulwa lithe: “Siyavota nje ngoba sinethemba lokuthi umholi ozongena uzoqinisekisa ukuthi sithola intuthuko. Okubi ukuthi sivota sijeqeza ngoba asazi ngobani abasibukayo futhi kuzokwenzekani ntambama uma sekuphele ukuvota? Siyesaba kakhulu,” lisho kanje.
Ukushuba kwesimo kungenxa yokuthi umphakathi ufuna kubekwe esihlalweni inkosi uSikhosiphi Mdluli
Ngesikhathi lihambele esikhungweni esisekoleni iWillowfontein Intermediate, ilungu lesigungu esiphezulu se-ANC uDkt Zweli Mkhize, likhuluma nabezindaba lithe sibe sincane kakhulu isikhathi sokuthi kuxazululwe izinxushunxushu ngesikhathi kuqokwa amakhansela.
“Leyo nto yenze ukuthi kubekhona ukuphazamiseka, kodwa ezindaweni eziningi lapho besaba khona besibaqoqa sibachazele ukuthi noma kungakhethiwe umuntu obumfuna kodwa lowo muntu ubesayilungu le-ANC futhi akukhethwa bonke abantu ukuthi bangenele ukhetho,” usho kanje.
UMkhize uvote esikhungweni iSithembokuhle khona eWillowfontein, kanti uhambele izikhungo ezimbalwa kuleya ndawo ehlola ukuqhubeka kokhetho
UNksz Zinhle Mthiyane ovote esikoleni iSilwangetshe Primary, uthe unesiqiniseko sokuthi inhlangano ayivotele izonqoba kuqhubeke intuthuko endaweni.