BASHAYE bachitha nesamba semali engaziwa abasolwa abebehamba ngeMercedes Benz emnyama begebenga imoto yemali.
Umbiko ovela endaweni yesiga uthi abasolwa bavimbezele imoto yemali kuN4 ejikeni laseMarikana bevulela ngenhlamvu bebhekise kuyo yaze yama ngaphambi kokuba bayiqhumise ukuze kuhlale obala i-safe egcina imali.
Lokhu kwenzeke ngoMsombuluko ebusuku ngesikhathi imoto yemali ibheke eRustenburg.
Sebebaleka abasolwa, kuthiwa bahlangane nemoto yamaphoyisa neyonogada benkampani ezimele, kwaba ongaphansi nongaphezulu kududulwana ngenhlamvu.
Amaphoyisa azamile ukubavimbezela kuphela umgwaqo ngasemayini iK4, kodwa zajika izigebengu zanikela kuwona ngqo ngenhlamvu ziphuma kule ndawo, kwaba wukuphunyuka kwazo.
“Kutholakale i-rifle endaweni obekudutshulwana kuyo namagobolondo angu-22 ezinhlamvu,” kusho amaphoyisa ngesitatimende.
Icala liphenywa wuphiko iDirectorate for Priority Crime Investigation (DPCI) kanti akukaboshwa muntu okwamanje.