BAFUNA yehle esikhundleni imeya abayisola ngokujuxuza isebenzisa imoto yomkhandlu.
I-EFF ne-IFP bafake isiphakamiso sokungabethembi ubuholi beMeya yokhandlu waseMpendle, uMnuz Buyisani Mlaba njengoba bemsola ngokuphendula ‘isekisi’ imoto yomkhandlu.
Ngokwesiphakamiso salawa maqembu kuthiwa imoto yomkhandlu esetshenziswa wuMlaba ike ibonakale ime ezindaweni ezidayisa utshwala, igibelise abantu besifazane abangagunyaziwe ukuyigibela.
Kepha uMlaba uyaziphika lezi nsolo njengoba ethi ziyitulo lokucekela phansi igama lakhe.
Isiphakamiso sokungabethembi ubuholi bukaMlaba safakwa yikhansela le-EFF, uMnuz Sifiso Zuma, sesekwa yikhansela le-IFP, uMnuz Neliswani Ngubane.
Lesi phakamiso sathulwa emhlanganweni womkhandlu owawungoLwesihlanu kepha umhlangano waguqa kungakaphothulwa ukulalelwa kwaso.
USomlomo, uMnuz Sizwe Ndlela, wawuguqisa umhlangano njengoba wawungasalawuleki.
Alukabekwa usuku okuzohlala ngalo umhlangano okuzoqedelwa kuwo ukulalelwa kwalesi phakamiso.I-IFP isola uMlaba ngokuphazamiseka komhlangano wangoLwesihlanu.
UNgubane uthe umsindo wasuswa wukuthi uMlaba akhiphe iselula, ayibhekise ngakuZuma, owayethula isiphakamiso sokungabethembi ubuholi bakhe.
Uthe emva kwalokho abeANC babe sebephakamisa ukuthi kuvotwe ngezandla uma sekuvotelwa ukungabethembi ubuholi bukaMlaba.
UNgubane uthe basichitha lesi phakamiso njengoba base bezizwa bengaphephile, besola ukuthi uMlaba uyabaqopha uma bekhuluma.
UNgubane uthe njengoba besalinde usuku olusha okuzohlala ngalo umhlangano, bazokuya enkantolo beyofaka isicelo sokuthi kuvotwe ngokuyimfihlo uma sekulalelwe isiphakamiso sokungabethembi ubuholi bukaMlaba.
Uthe bamfuna ehambile uMlaba njengoba ethe izinto azenzayo zehlisa isithunzi somkhandlu.
Uthe enye yezimoto ezisetshenziswa wuMlaba, iToyota Fortuner, yaze yalimala ihamba zona izindlela zobumnandi.Uthe le moto yalimala ihamba umuntu ongagunyaziwe ukuyishayela.
“Kuthiwa babekade behleli ndawana thizeni, kwase kuphela utshwala ababebuphuza. Kuthiwa imoto yabe isinikwa omunye umuntu ongavumelekile ukushayela imoto yomkhandlu, yalimala endleleni.”
UNgubane uphinde wasola uMlaba ngokusebenzisa ulimi oluqosheme ebasebenzini bomkhandlu nasemakhanseleni.Uthe lokhu waphinde wakwenza ngesikhathi ekhuluma nabafundi basezikoleni ezisezindaweni ezingaphansi kwalo mkhandlu.
“Izikole zathi ziyambonga, angaphinde abuye. Wayekhuluma izinto ezehlisa isithunzi, ikakhulukazi labo abanezingane.”
UMlaba uzichithile zonke izinsolo abekwa zona.Uthe akusilona iqiniso ukuthi imoto yakhe ike ibonakale ezindaweni ezidayisa utshwala.
“Mina utshwala angibuphuzi. Kungamampunge ukuthi imoto ike ibonakale ezindaweni zokucima ukoma. Indawo okuke kwenzeke ngiye kuyo yi(eyigagula ngegama). Idayisa inyama eceleni, bese kuba utshwala eceleni.
“Ngisuke ngiyothenga inyama. Nawo lawa makhansela ngake ngawatshela ukuthi ayithwebule imoto uma eyibona endaweni engavumelekile ukuthi ibe kuyona kodwa abakaze bakwenze lokho.”
Uthe imoto eyashayisa yayishayelwa ngumuntu ogunyaziwe ukuyishayela.
Ukuphikile nokuthi waba yingxenye yokuphazamisa umhlangano wangoLwesihlanu, wathi waphazanyiswa ngamakhansela amaqembu aphikisayo ayebalekela ukuthi kuvotwe ngezandla.
Waphinde wachitha izinsolo zokusebenzisa ulimi oluqosheme.
UMlaba uthe zonke lezi nsolo ziyingxenye yetulo lokumketula esikhundleni, wathi ushayelwa ukuthi ulwa nenkohlakalo.
Kuthintwa uNdlela, ucele ukunikwa ithuba lokuqala axoxe nabambisene nabo emkhandlwini, ngaphambi kokuthi aphawule.
Uthe uma esephinde eshayelwa ucingo lwakhe lwangabe lusangena.Kanjalo nokhulumela i-ANC kwisifunda iMoses Mabhida, uMnuz Njabulo Mtolo, naye ucele ukunikwa ithuba lokuphenya lolu daba ngaphambi kokuthi aphawule.
Akabange esetholakala uma esephinde eshayelwa.