UMNYANGO wezokuBusa ngokuBambisana neziNdaba zoMdabu KwaZulu-Natal uthi bekungekho emthethweni ukumiswa kwamakhansela amabili akuMasipala waseMthonjaneni, amiselwa ukulova emhlanganweni womkhandlu.
UMasipala waseMthonjaneni wamisa owayekade eyimeya yalo mkhandlu, uMnuz Sibonginkosi Biyela, nekhansela leNFP, uNksz Ncamisile Magwaza, ngoba ubasola ngokulova emhlanganweni yomkhandlu.
Lo masipala uphethwe i-IFP.
UBiyela usuka kuyona i-IFP njengoba ubeyimeya yayo ngaphambi kokuthi imxoshe ngaphambi kokhetho lohulumeni basekhaya lwangonyaka owedlule.
Wabe esejoyina i-ACU, okuyiyo ayimele njengamanje.
Isinqumo sokumisa uBiyela noNksz Magwaza sathathwa emhlanganweni wesigungu esiphezulu bebhekene nezinsolo zokulova emhlanganweni womkhandlu ngaphandle kwezizathu.
Umbiko owathulelwa umhlangano wesigungu esiphezulu uveza ukuthi uBiyela wayalela umsebenzi kamasipala ukuba asayinele yena noNksz Magwaza izincwadi zekhefu, ngaphandle kokuthola imvume ezikhulwini ezifanele.
Kepha uMnyango wezokuBusa ngokuBambisana neziNdaba zoMdabu eKZN, uthe ukumiswa kwabo akukho emthethweni.
UNgqongqoshe woMnyango, uMnuz Sihle Zikalala, uthe isigungu esiphezulu kasinawo amandla okumisa amakhansela.
Ukusho lokhu ngesikhathi ehlangene nalo mkhandlu ngoLwesibili.
“Maningi amaqembu ezepolitiki asibhalele ekhala ngalolu daba. Sibona kungcono sizwakalise ukukhathazeka kwethu ngalesi sinqumo esingekho emthethweni.”
UZikalala uthe umthetho uthi umkhandlu kufanele ubhalele yena ongungqongqoshe womnyango, umcele ukuthi amise noma axoshe ikhansela elisuke litholwe lephule umthetho.
Uthe umkhandlu unamandla okuxwayisa noma okukhuza ikhansela elisuke litholwe ukuthi liphule umthetho.
UZikalala uyalele umkhandlu ukuba uhloniphe umthetho.
“Uma imikhandlu ithatha izinqumo ezingekho emthethweni, lokhu kuholela ekutheni ziyiswe enkantolo. Lokhu kuholela ekutheni imikhandlu kugcinwe sekuthiwa kayikhokhe izindleko zenkantolo uma ihlulwa yilawo macala. Lokho kuholela ekutheni kugcine kusebenziseka izimali zomkhandlu ezintweni ezingenasidingo.”
UBiyela uthe akazukuphawula ngalolu daba njengoba ubengekho emhlanganweni okukhulume kuwo uZikalala futhi usamisiwe emsebenzini.
Imizamo yokuzwa ukuphawula kukaNksz Magwaza kayizange iphumelele njengoba ucingo lwakhe belungangeni.
Kanjalo nemizamo yokuzwa ukuphawula kukasomlomo kaMasipala waseMthonjaneni, uNkk Ntombiyenkosi Mbatha, ayizange iphumelele.