UMA ungasebenzi uyakuhalela ukuba osethole itoho kodwa iqiniso lithi ukusebenza kuhambisana nezingqinamba eziningi futhi eziphindiwe ikakhulu kwabesifazane. Ukuba umama ekhaya kuwumsebenzi ophindiwe nohambisana nezinkinga ezingapheli kodwa ukubhekana nengcindezi, ubandlululo neholo elingeneli kungenza ube nokhwantalala emsebenzini.
Ungoti oweluleka ngempilo nophinde abe ngungoti obhekela indlela yokudla okunempilo, uDkt Ella Ford Mthethwa odaduka eGreater Edendale eMgungundlovu nongumnikazi we-Ellagence Wellness Boutique ubhale incwadi ethi Perfect Landing Wrong Airport. Le ncwadi uhlose ngayo ukusiza abesifazane ukubhekana nengcindezi nokucwaswa ngokobulili emsebenzini babe nezindlela eziphusile zokuzilwela. Lokhu kulandela ukuthi uDkt Mthethwa ehlangabezane nabesifazane abaningi ababhekene nale nkinga nokuyinto adlula kuyo naye.
"Igxile kakhulu ohambweni lwami ngokucwaswa emsebenzini nasebhizinisini, incwadi izosiza kakhulu ngamacebo okufinyelela lapho befisa khona. Uma kuza kwezobuholi sisasilele kakhulu singabantu besifazane ngisho emsebenzini kunengcindezi yobulili.
Ngeke sikuvumele ukuthi intsha ibhekane nesimo esifanayo, silwela lokho ukuthi kulungiswe izinto nabesifazane bathole amathuba ngokulinganayo ukuze babe nendima abayidlalayo ukuthuthukisa umnotho," kusho uDkt Mthethwa.
Eqhuba uDkt Mthethwa uthe lesi yisiqalo ngencwadi kodwa kuningi okuhambisana nengcindezi yasemsebenzini ngoba nabesifazane bebodwa bayacindezelana. Ngaphandle kwabesifazane usethole nezicelo eziningi kwabesilisa nabo beveza izimo ezinzima ababhekene nazo emsebenzini.
Le ncwadi yethulwe nakwiBrics Women's Alliance nakwiG20 Empower Summit e-India lapho bekunezingxoxo zokudingida ukungalingani ngokobulili nokusalela kwabesifazane. UDkt Mthethwa uphinde abe yingxenye yeBlack Management Forum kuleli.
Ephetha uDkt Mthethwa, uthe abesifazane abaningi abangazivaleli bagodle amakhono abo nemibono ephusile abanayo engathuthukisa iNingizimu Afrika. Lokhu uthe bangakwenza ngokubambisana bengabesifazane bacobelelane nangolwazi olufanele banqobe njengembokodo eyalwela inkululeko ngezikhathi zobandlululo. Yize le ncwadi eyibhale yagxila kwabesifazane kodwa nabesilisa bangasizakala ngamasu atholakala kuyo.
IPerfect Landing Wrong Airport izokwethulwa ngokusemthethweni ngo-Agasti 26 eWoodbush Road, eWaterfall eseHillcrest eThekwini ngo-12 emini.