INJABULO ibhalwe ebusweni kubanikazi benkundla enkulu yezokuxhumana, iFacebook, njengoba belindele umntwana wesithathu. UMark Zuckerberg unameke isithombe ekhasini lakhe esiphelezelwe wumbhalo ozwakalise indlela ajabule ngayo nonkosikazi wakhe ozithwele, uPriscilla. " Uthando luyachichima, kuyangijabulisa ukunazisa ukuthi uMax no-August bazoba nosisi omncane ngonyaka ozayo," kusho uMark.
Balokhu bebabongele njalo abantu bamazwe ahlukene okubalwa nezakhamuzi zaseNingizimu Afrika.
"Ungananazi uma ufuna iminikelo, ungazise," kusho uKweksa-Bana.
"Izindaba ezinhle kakhulu," kusho uDavid Fischer.
"Siyanibongela ngezindaba ezinhle, ngenhlanhla uMax uzobe esekhule ngokwanele ukugada ingane," kusho uVivian Wu.
Abakuleli nabo babonakele bephawula sakumangazwa yilezi zindaba, babodwa ababasola ngokulamanisa eduze.
"Kanti nifuna izingane ezingaki," kubuza usomahlaya, uMondli Mzizi.
"Kunihlulile ukuzibamba kula makhaza," kusho uNomfundo Mabena.
