USIVIKELE ngempumelelo isicoco sakhe seRed Bull Shay’iMoto uSamkeliso “Sam Sam” Thubane eWheelz n Smoke, eGoli, ngempelasonto.
USam Sam uhlule abashayeli abangu-11, abencintisana nabo ngokulawula imoto ishaya izidudla ibe ichusha nasezintweni ezibekiwe futhi enza neminye imigilingwane. Phakathi kweminye, kufana nokuphuma ebhuthini nokudlala isigingci imoto ibe iphenduka.
Kowamanqamu uSam Sam, obuye aziwe ngeKing of Hazyview, ubesesele no-Austin Kruger.
“Ngijabule ngokuba wumshayeli wokuqala ukuwina lesi sicoco kulandelana. Ekuqaleni kosuku bengingazizwa kahle kodwa ngicabanga ukuthi ukunuka kwethayi kungilaphile ngoba ngithe ngingena emotweni ngazizwa. Angikholwa namanje ukuthi nginqobile,” kusho uSam Sam.
Kule minyaka emibili edlule, umcimbi ubusingathwa ngaphande kwezihlwele kanti kulokhu bekunabantu abangu-4 000.
Kulo nyaka kuphinde kwengezwa umculi wekwaito, uKabelo Mabalane, njengejaji. Ujoyine izingwazi zalo mdlalo uMagesh Ndaba, Jeff James noShahiem Bells.
UKabelo uthe uyabahlonipha abashayeli ngethalente labo.
Uhlelo beluphethwe nguVic Pardal no-Anele Zondo.