ABENZI bezimoto beKIA South Africa bethule umkhankaso iTest Drive for Good KwaZulu-Natal lapho benxenxa khona abantu ukuthi bayisize ukuqoqela imali inhlangano esiza umphakathi iGift of the Givers.
Ngale mpelasonto iKia izonikelela iGift of the Givers ngoR100 ngomuntu ngamunye ozovivinya imoto yale nkampani emagaraji ayo kwangu-12 akulesi sifundazwe.
Isikhulu seKia South Africa, uMnuz Gary Scott, sithe bagubha iminyaka engu-25 bekuleli futhi inkampani yabo ibe KwaZulu-Natal kusuka bephemba.
"Njengoba sigubha impumelelo yethu ngalesi sikhathi, sifuna ukuhlwanyela emphakathini esiwusebenzisayo egameni lesiqubulo sethu esithi Movement that Inspires futhi iKia ifuna ukubambisana nazo zonke izikhamuzi zakulesi sifundazwe, akukhathaleki ukuthi zingabanikazi beKia noma cha," kusho uScott.
Le nkampani isinesikhathi yeseka le nhlangano kanjalo nenkampani ngokuzimela eyengamele, iMotus Holdings. Ike yanikela ngezimoto ezine futhi ngo-2021 yanikela ngeSportage eyayihamba isikhulu seGift of the Givers, uDkt Imtiaz Sooliman. Ekuqaleni kwenyanga inikele ngoR100 000.
Ithe ngalo mkhankaso ihlele ukuthi kube ngabantu abalinganiselwa ku-3 000 abazobamba iqhaza phakathi kwanamhlanje noMsombuluko.