SIVUMBUKE nesiqholo isiphuzo esidakayo esikhonzwe kakhulu abesifazane nesingesinye seziphuzo ezihlala ziwundaba mlonyeni ezinkundleni zokuxhumana.
AbeBrutal Fruit namhlanje bathule isiqholo esibizwa ngokuthi You Belong abahlose ngaso ukuvikela isithunzi sowesifazane.
Imenenja yeBrutal Fruit South Africa uRamona Kayembe ithe kungaba into engalindelekile lena kodwa bakubone kuwumqondo omuhle ukwenzela amakhasimende abo into ehlukile.
" Kuyasijabulisa ukuthi sethule isiqholo iYou Belong kumakhasimende aseNingizimu Afrika. Sethemba ukuthi izongena nakubantu ihlale isikhathi eside beyithakasela ngoba ayikho into ejabulisa njengokungena endlini abantu behleli bajike nawe ngenxa yokuthi unuka kamnandi. Siyaziqhenya ngale ndlela esiyithathayo,"kusho uRamona.
Ephetha uthe babambisene nongoti bamakha kanti igabe ngephunga lezithelo, amakha emvelo aphuma ezihlahleni nokunye okuningi. Imiphumela yalesi siqholo uthembise ukuthi mihle kakhulu futhi siyakhanga.