UVUNYWA yisikhathi umlingisi ophinde abe ngomunye wabasakazi bohlelo lwantambama kwiGagasi FM, uKhaya Dladla njengoba maduzane ezokwethula uhlelo i-Our Perfect Wedding.
UKhaya uzobonakala maduze kulolu hlelo oselukhonjiswa ngoMgqibelo ngo-7ebusuku kwiMzansi Magic (161).
Umthombo weSolezwe ongashayi eceleni uveze ukuthi uKhaya useqalile ukuqopha lolu hlelo njengoba besanda kuqeda izinkontileka nabasunguli balo.
“UKhaya unenhlanhla enkulu ngokuthola ithuba elifana naleli,ohlelweni nakuye kungumlando njengoba bekuyithuba angalilindele kodwa laziveza futhi walibamba ngezandla zombili. Enkundleni yakhe yokuxhumana uke wafaka i-video, ekhombisa eqopha,” kusho umthombo.
Isolezwe ngeSonto likhulume noKhaya okuqinisekisile ukuthi kukhona uhlelo azobonakala kulona kodwa wala waphetha ukuveza ukuthi yiluphi.
Uvumile ukuthi lolu uhlelo ngoseluvele lukhona kodwa yena uzoba ngumethuli omusha kulona.
“Uyazi imibandela yezinkontileka esinikezwa yona ayisivumeli ukuthi simemezele singakashayi isikhathi kodwa maduze abantu bazokwazi,” kusho uKhaya.
ULucky Mangela weMzansi Magic uveze ukuthi okwamanje bebengakazi ngabanye abethuli abasha kulolu hlelo kodwa bazobheka nabanikazi balo. Kulolu hlelo kusanda kwethulwa uNonkanyiso Chonco odume ngelikaLa Conco, njengomethuli walo omusha njengoba lusanda kubuya.
Ngokujwayelekile baba babili abethuli balo kodwa bekungakamenyezelwa ukuthi uLa Conco uzoshintshana nobani.
UKhaya uthola leli thuba nje ungomunye wabalingisi abahamba phambili emdlalweni iHouse of Zwide kwi-e.tv.