UMCULI we-Afro pop, uVernotile, uthi uthemba ukuthi ukuqhubeka lapho egcine khona nyakenye nomculo wakhe, kuzogcina kuhehe iso nendlebe kaSjava, alobizela ukuqopha ingoma naye.
UVernotile (24) waseNanda, eThekwini, uthe nakuba kuyisifiso sakhe esikhulu ukugcina esebenze neNdlalifa KaJama kodwa akafuni kube wuye oyicelayo - kunalokho ufisa umsebenzi wakhe umkhulumele kuyona.
“Angifuni kube yimi omhlupha ngokucela senze ingoma kodwa ngifuna ukuqhubeka nokwenza kahle ezingomeni zami nengipikwa kuzona aze abone ukuthi nginekhono elilungele ukusebenza naye,” kuchaza uVernotile.
FUNDA NALOLU DABA: Utakulwe wumdlalo omusha obekwi-The Queen
Lo mculi ukhuluma kanjena nje, akamusha kwezomculo njengoba eseke wapikwa ezingomeni zoNobuhle, Citizen Deep, Sun-El Musician, Ma-E noMbZet, ukubala abambalwa.
“Kuyangisiza ukupikwa ezingomeni zamanye amaciko ngoba kwenza ngigqame futhi kungisize kakhulu nyakenye, ngaqashwa emicimbini eminingi ngenxa yakho,” kusho uVernotile onengoma ethi Ngenzenjani ephrojuswe wuXWise, ephume ngonyaka odlule.
Ephetha, uthe uma konke kuhambe kahle - uzokhipha i-EP bese eqhubeka nokushaya ingoma namaciko aziwayo.