USOMAHLAYA, uNomthandazo 'Nonto R' Rubushe, ubuye nezindondo emiklomelweni yamancoko, ama-10th Savanna Comics Choice Comedy Award, abeseThe Galleria, eSandton, ngoMgqibelo ebusuku.
UNonto R, odabuka eMandeni, uhlabane emunxeni weBreakthrough Act of The Year nakoweThe Joe Mafela Award.
“Ngiqokwe kabili phambilini, ngase ngiyawina okwesithathu. Kuyangijabulisa ukuthi umsebenzi uyabonakala. Abantu engisebenza nabo bayangibona, nomphakathi uyavota. Ukuthi uyahlekisa noma cha waziwa ngozakwethu nomphakathi ngakho imiklomelo yinto engikhuthazayo ukuthi ngiqhubeke nokwenza ngendlela engenza ngayo,” kusho uNonto R owine indondo yeBest Reaction Video by DStv kumaDStv Content Creators Awards.
Uthe akamile kodwa ufuna ukwenza umjikelezo wezindawo ezahlukene.
“Ngake ngaqala ukunandisa ngaphandle, eBangkok nasePhuket eThailand kodwa kwaba neCovid-19. Isifiso sami ukuthi ngiqhubeke nalezo zinhlelo ngibone ukuthi ngizofika kuphi.”
Uveze nokuthi uvulelekile nokungenisa kwithelevishini noma emisakazweni inqobo nje uma ezokwenza into engeke imshintshe ubuyena.
“Uma ubuka abantu abanjengoSteve Harvey noKevin Hart uma benza ifilimu noma yini, ababi ngabantu abahlukile. Siyabazi bayahlekisa. Nami ngifuna into enjalo.”
Abebeqokwe kakhulu - izikhawu ezintathu bobabili - uSifiso Nene noThabiso Mhlongo, bahlulwe kuyona yonke iminxa abebekuyo.
Izithameli zibuyele emakhaya zibuhlungu izisu ngenxa yamahlaya abeqhululwa ngabadle umhlanganiso. Kwabebethula izindondo kubalwa uCarvin H Goldstone noTsitsi Chiumya. Obephethe uhlelo yingwazi kasomahlaya esagobe amadlangala e-United Kingdom, uLoyiso Gola.
Lo mcimbi uzokhonjiswa kwiMe Channel (DStv Channel 115) ngoMeyi 13 ngo-7 ebusuku kanti iSavanna Newcomer Showcase bangayibuka kulesi siteshi ngoMeyi 6 ngesikhathi esifanayo.
Uhlu lwabanqobile lumi kanje:
Breakthrough Act of the Year Award
Nonto R
Savanna Newcomer Award
Wazi M Kunene
Hall of Fame Award
Alan Committie
Best Comedy Festival or Show Award
Johannesburg International Comedy Festival
Sauce of the Year Award, Presented by Mrs Ball’s
Dillan Oliphant
Funny Influencer Content Award
Robby Collins - For the campaign: Pothole FM by Joe Public & Dunlop
Funny is Funny Award
King Price - For the campaign: #TestTickles by Freckle
UpLIFTing Comedic Content Award, Presented by LIFT
Rory Petzer
Best Solo Show Award
Kagiso KG Mokgadi
The Joe Mafela Award
Nonto R
Comedian of the Year Award
Robby Collins