KUZODELA amakhasana ozozibonela ngawakhe izihlabani zomculo kacothoza zidlana imilala bukhoma kwiBest Live Performance kuma-2024 SIP Isicathamiya Music Awards eJohnny Makhathini Hall eNdwedwe ngalo Mgqibelo kusukela ngo-10 ekuseni.
Ngokusho komgqugquzeli nomsunguli walo mcimbi, uSaziso Dlamini, amaqembu azobe ebanga isiteki sikaR40 000. Kumaqembu azobe ebanga lomklomelo kubalwa iBergville Green Lovers, NMZ Power Singers, Nombika Black Boys, Machunwini Black Swallows, Ndwedwe New Resolution, Highlands Vela Brothers, Amanda Amhlophe, Ndwedwe Original, Mpumalanga White Birds, Royal Messengers, Xolo Can't Get, Abafana bokuthula, Douglass Lover Boys, Inkululeko oMashiyakukhalwa, neNdwedwe Perfect Boys.
Eqhuba uSaziso uthe iqembu elizohlabana kwiBest Isicathamiya Group lizokhala lemuke nesamba sikaR5000 bese umlandeli ovote kakhulu ahlomule ngoR2 500.
"Kulo mcimbi kuzobuye kubungazwe iqembu lesicathamiya eseliwuzungezile umhlaba futhi lihlabana uma liqhathwe nezingwazi zamazwe iKholwa Brothers," kusho uSaziso weSaziso Infotainment Projects.
Kweminye iminxa kuboshelwe kanje. KwiBest Song Of The Year kuqhudelana Abafana Bethembelihle - MfokaMaziya, Pomeroy Gordon Stars- Ngithule Engathi Angimhoni neXolo Can't Get-Impilo Kayihlangani. KwiBest Song of all time kuqhathwe iMachunwini Black Swallows - Umshikashika, iMpumalanga White Birds- UThobile neRoyal Messengers-Lafa Ngathi.
KwiBest Album Of The Year kukhona iXolo Can't Get, Pomeroy Gordon Stars- naBafana Bethembelihle.
KwiBest Upcoming Group kutholene phezulu Inkululeko, Ndwedwe Perfect Boys neYoung Singers kanti kwiBest Usicathamiya Radio Presenter kudlana imilala uDlabazane weHarry Gwala FM, uFundisa Mzobe we-Icora FM noMzukisi Nqubula weNgwane FM.
Umethuli woGubhu Lwami ku-1KZN TV, uSipho “Madlokovu” Ngema, uzobe ephethe uhlelo kwiSIP Isicathamiya Music Awards eJohnny Makhathini Hall, eNdwedwe