SEKUVELE ukuthi abakhokheliwe abalingisi bemidlalo i-Queendom eqoshwa yinkampani i-Clive Morris Production, ne-Pound 4 Pound eqoshwa yi-Bakwena Production ephethwe ngumlingisi uKagiso Modupi. Yomibili imidlalo ikhonjiswa esiteshini sakwa-BET (129).
Abalingisi bale midlalo sebekhethe ukubhalela uNgqongqoshe wezeMidlalo, amaSiko nezobuCiko uGayton McKenzie, becela ukuthi angenele.
Bakhala ngokuthi uKhisimusi wabo uzoba mnyama njengoba izinkinga zabo zaqala ngo-Agasti.
Ezinyangeni ezedlule umdlalo i-Queendom uke wama ukukhonjiswa ngenxa yokuthi abalingisi bakhetha ukuhudula izinyawo ngoba bengayitholi imali yabo.
Namanje kuvela ukuthi abalingisi nabasebenzi bonke bemidlalo sebekhethe ukuduba ukuqopha ngenxa yokungakhokhelwa.
Encwadini abayibhalile bathe bacela ungqongqoshe angenele ngoba beqanjelwa amanga ngemiholo yabo.
“Sidinga ungenele ngqongqoshe njengoba isiteshi sakwa-BET nenkampani i-Clive Morris bedinga ushintsho olukhulu nemigomo okumele baphathe ngayo abasebenzi. Sibhekene nesimo esingesihle njengoba sizoba namaholidi amnyama.
“Imizi iyadliwa, asikhokhile lapho sihlala khona, imindeni yethu ilambile. Nonke nithule besicela nibeke imigomo ezosikhulula sonke. Imiholo yethu kudala sayilinda, kodwa akekho oza kithi azositshela ukuthi senze kanjani, besicela usisize,” kuchaza incwadi yamaciko.
Iqhuba ngokunxusa ungqongqoshe ukuthi akeze kubo ukuze bavule izifuba ngokungajabuli kwabo futhi aphinde ahlangane nazo zonke izinhlangano ezithintekayo.
Esitatimendeni esibhalwe inkampani iClive Morris, abaphathi bale nkampani baxolisile ngalesi simo bathi nabo singaphezu kwamandla abo.
Bathe imiholo yabasebenzi bonke eyenyanga neyale nyanga obekumele bayithole ngoDisemba 17, ngeke basayithola kodwa bathembisa ukuthi izongena ngoMsombuluko.
Baveze ukuthi ngisho ukuqopha obekuqhubeka kuzoma njengoba beyoze babuye baqhubeke ngenyanga ezayo.
“Sizolinda imihlangano yokugcina nesiteshi nabanye abathintekayo ukuze sibheke ukuthi sizokwenza kanjani ukuze siqedele ukuqopha iziqephu ezisele ngoJanuwari. Siyaxolisa ngemiholo engakhokhiwe,” kuphetha isitatimende.
UMonde Twala wakwa-BET waphawula ngodaba lokungaholelwa kwabalingisi be-Pound 4 Pound ngenyanga edlule wathi bazoqinisekisa ukuthi inkampani eqopha lo mdlalo ikhokha yonke imiholo ngendlela efanele.