ISIHLABANI somculo kamaskandi, uThokozani "Somnandi" Langa, sithukuthele siyaveva emuva kokubizwa ngaphansi kweziketi zikanina ngabalandeli ezinkundleni zokuxhumana ngenxa yokusala ngaphandle kwamaqhawe abo kwiSomnandi Music Festival esoLundi Stadium ngoDisemba 17.
Lo mcimbi ususe umsindo ezinkundleni zokuxhumana kubangwa uhla lwabazonandisa. Umsindo ubuhambisana nokuqhululwa kwenhlamba ibhekiswe kuSomnandi, nokuyinto engazange yehle kahle kuye.
USomnandi uthe kumxakile ukuqhululwa ngenhlamba engaka ekubeni engekho umculi anenkinga, naye nabefisa angabibikho emcimbini wakhe.
"Ngiyakuqonda ukuthi kukhona abangekho la kodwa ngoba ngiyakholwa ukuthi lo mcimbi awugcini, siyokubuka lokho kodwa kubuhlungu ukuthukwa ngabantu entweni yakho. Uthe naye kunemicimbi angaqashwanga kuyo kodwa uhlale ekuthandazela ukuba akangabibikho umuntu oyothuka labo bahleli egameni lakhe.
Kubaculi ababoshelwe emcimbini kaSomnandi wokuqala kubalwa Imithente, Mashelela, Dumakahle, Mzukulu, Bonakele, Gatsheni, Ali Mgube, AmaYellow Bone, Khuzani, Igcokama Elisha, Stability, Mdumazi, Shwi, Mtekhala, Ithole Lendidane, Saliwa, Mroza, Falabo, Qhosha, Zulu Messengers, Mfiliseni Magubane, Dr Buselaphi, Abanqobi, Colenso Abafana Benkokhelo, Mashwabana, Mdabu Ngqulunga, Abanqobi, Jumbo, Professor Langa, Sjava, Amaroto, Inkosi Yamagcokama, Aubrey Qwana, Bahubhe, Skweletu, Phuzekhemisi, Ithwasa Lekhansela, Thobekile Mkhwanazi nabanye. Uhlelo luzobe luphethwe wuZimdollar, KissB4, Linda Sibiya, Mroza Wangempela noMafresh.
Akubona bonke abamthukile, kodwa bakhona abamncomile ngohla alukhethile bethi wenze ubulungiswa ngokuqasha abaculi abashisa izikhotha nasebemnkantshubomvu. Ubuye wanconywa ngobuhlakani bokuqasha uShwi noMtekhala ngokwehlukana.
Khona manjalo uSomnandi uzokwethula ngokusemthethweni lo mcimbi ne-albhamu yakhe entsha esihloko sithi Is'khiye Se-coldroom ezndlini ezindala zesiShayamthetho, oLundi ngoLwesine kusukela ngo-3 ntambama.
Kuleli cwecwe elinezingoma ezingu-15, uSomnandi ubophele ozakwabo okubalwa kubo, uMduduzi Ncube, Khanyo Maphumulo, Njencane, Thulani Manana, Ithole Lendidane noFace To Face.