KUCHAZEKE inqwaba yabantu bakuleli ngesikhathi ingwazi yeR&B yase-USA, uJeffrey Osborne, ibingelela ezinkundleni zokuxhumana ngengxenye yehubo lesizwe, iNkosi Sikelela I-Afrika.
Lokhu kwenzeke ngesikhathi lomculi etheleka esikhumulweni sezindiza saseNingizimu Afrika, i-OR Tambo ngoLwesibili.
UJeffrey Osborne uzonandisa kuchungechunge lwamakhonsathi akhe, olubizwa ngeYou Should Be Mine South African Tour.
Kule ndumezulu yomcimbi lo mculi uzosina ededelana noKhuzani, Vusi Nova, Brian Temba, Msizi Shembe, Ntando, Linda Gcwensa, Zakwe, Duncan, Collen Zondo, Mzokoloko, Mazola, Kenny K noNhlanhlo.
Lolu chungechunge luqala namhlanje eGrandwest Arena, eCape Town kusukela ngo-6 ntambama.
Luzodlulele ePietermatizburg Athletic Stadium, eMgungundlovu ngoMgqibelo naseSunbet Arena, ePretoria ngoMashi 20 bese imbenge isongwa e-Emperors Palace, eKempton Park eGoli ngoMashi 29.
Amathikithi athengwa ubuthaphuthaphu eTicketpro, ezitolo zaseSpar Payzone nasePostnet kuzwelonke ngoR490.