UMREPHA oshisa izikhotha kulezi zinsuku, uJabulani "Big Zulu" Nene, usephonsele inselelo uzakwabo, uRefiloe "Cassper Nyovest " Phoolo, ukuba ziye ngamagama enkehli.
Kuzokhunjulwa ukuthi uCassper Nyovest (31), ngaphambi kokugingqa phansi uRicardo "Priddy Ugly" Moloi (29), ngesonto eledlule, wamemezela ukuthi uma ehlulwa kule mpi uzothatha umhlalaphansi esibhakeleni kodwa uma ewina, uzofuna ukulwa noBig Zulu (36).
Esenqobile uCassper kuPriddy Ugly, akasayithi vu ekaBig Zulu kodwa usefuna imbangi yakhe ngokomculo, uKiernan "AKA" Forbes. UBig Zulu usephumele obala wanxusa uCassper ukuba ayeke ukuhambela kude.
"Beka usuku nesikhathi, ngizobe ngikhona Mufasa (okuyigama aziteketisa ngalo uCassper). Lashona ilanga," kubhala uBig Zulu kuTwitter.
Labo mrepha bake bacula ndawonye engomeni kaBig Zulu ethi AmaMillion.
Yize uBig Zulu ehubha uCassper kodwa lo mculi uhubha umculi we-Afro house, u-Anga "NaakMusiQ" Makubalo (35) ukuba abuyele naye eringini noma abuyise ibhande ngoba akasafuni ukulivikela.
UNaakMusiQ noCassper batholana phezulu eSun City ngo-Ephreli walo nyaka, kwanqoba uNaakMusiQ.
"Uyangixaka manje uNaakMusiQ uma engasafuni ukulwela ibhande. Umthetho wesibhakela uthi uma unqaba ukulwela ibhande, uyalibuyisa kodwa yena ubaleka nalo," kusho uCassper kwiSports@10 kuSABC 1 ngoLwesithathu.