SANDISWE ngabaculi bakamaskandi abangaconsi phansi isibalo samaciko azoshiyelana inkundla nengwazi edume umhlaba wonke, uJeffrey Osborne ePietermaritzburg Athletic Stadium, eMgungundlovu ngoMgqibelo kusukela ngo-6 ebusuku.
Abaculi abashisa izikhotha kulezi zinsuku, uKhuzani “Gatsheni” Ndlovu noMthandeni “Igcokama Elisha” Manqele sebeyingxenye yochungechunge lwamakhonsathi akuleli kaJeffrey Osborne, abizwa ngokuthi You Should Be Mine South African Tour.
Lezi zindaba ziqinisekiswe ngomunye wabahleli balama khonsathi okuqala kaJeffrey Osborne kuleli, uThulani Maphumulo.
Kulindeleke ukuba izethameli zibheme zikholwe njengoba uGatsheni eshiya abantu besahalela impinda ngenoni elithi Hit After Hit ekubeni uMthandeni esedume nasemazweni aphesheya ngelithi Paris.
Lezi zinsizwa zizobe zisina zidedelana noKhuzani, Vusi Nova, Brian Temba, Msizi Shembe, Ntando, Linda Gcwensa, Zakwe, Duncan, Collen Zondo, Mzokoloko, Mazola, Kenny K noNhlanhlo.
UJeffrey Osborne (76) onenqwaba yemiklomelo, uthembise ukuqhulula wonke amanoni akhe adume ngawo umhlaba wonke okubalwa kuwo elithi The Family, On The Wings of Love, Stranger, You Should Be Mine namanye angasoze abuna.
Lo luchungechunge luqale ngoLwesithathu eGrandwest Arena, eCape Town.
Luzodlulela KwaZulu-Natal ngoMgqibelo naseSunbet Arena, ePretoria ngoMashi 20 bese imbenge isongwa e-Emperor’s Palace, eKempton Park eGoli ngoMashi 29.
UThulani uthe amathikithi adayisa okwamagwinya ashisayo eTicketpro, ezitolo zaseSpar Payzone nasePostnet kuzwelonke ngo-R490.