UMLINGISI osafufusa kodwa osengusaziwayo ezinkundleni zokuxhumana, uSenamile Mhlongo, ungumthente ohlaba usamila endimeni yomculo. Kunabaculi okuphela ngisho iminyaka elishumi besazabalaza emavukaneni kodwa yena akakaqedi nonyaka engenile endimeni yomculo, usebalwa nezinkunzi.
Ubufakazi balokho wukuphenduka kwakhe inyama kubahleli bemicimbi, kangangoba usebalwa nezinkunzi. Nge-EP esihloko esithi Ngithanda Wena, uSenamile useqashwe oxhaxheni lwemicimbi.
Namhlanje uzobe eshiyelana inkundla nezihlabani zezinhlobo ezahlukene zomculo kwi-3rd Goduka Music Festival eKing Zwelithini Stadium, eMlaza. Kulo mcimbi le ntokazi yaseShowe izobe eshiyelana inkundla noKhuzani, Professor, Mapaputsi, Phuzekhemisi, Ithwasa Lekhansela, Igcokama Elisha, Sosha, Bullistic nabanye.
Amathikithi aseyatholakala eTicketPro nasezitolo zaseShoprite neCheckers ngoR100 nangoR500.
NgoDisemba 17 uSenamile uzobe egida ededelana noSjava, Slenda Da Dancing DJ, Junior De Rocka, Dlala Thukzin, Dladla Mshunqisi, Nomfundo Moh nabanye kwiNanda Dam Music Festival eMsinsi Resort. Kulo mcimbi kungenwa ngoR200 nangoR800.
Uzosuka lapho abhekise amabombo kwiHarding Summer Festival, eHarding Park ngoDisemba 17 kusukela ngo-4 ntambama kuze kuse emnyango. Kulo mcimbi uzobe ebhulela amazolo uJumbo, Nomfundo Moh, Professor, DJ Mngadi, DJ Tira, DJ Sox, Mjosty, Tzozo, Phindi P, DJ Mngadi, AmaSiblings, Babo Ngcobo, Thobekile, Zakwe, Lucky Nkosi, Dawn Thandeka King, Qhoshangokwenzakwakhe, DJ Nkoh, DJ Sgqemeza, DJ Nzwiri, Bhar, Calvinator, Sgwili, Bullistick, Sosha nabanye.
Amathikithi aseyatholakala ezitolo zaseSpar, Shoprite naseTicketPro. USenamile unxuse abathandi bobumnandi ukuba baphume ngobuningi ukuzokweseka imicimbi azobe enandisa kuyo.