UKUKHOTHAMA kukaNdunankulu kaZulu, uDkt Mangosuthu Buthelezi, kwenze kwahoxiswa umzungezo wokugqugquzela abazalwane ukuba bahambele iGcwalisa Spring Picnic - All White ezoba seHollywoodBets Kings Park Stadium, eThekwini ngoNovemba 4.
Lezi zindaba zimenyezelwe ekhasini likaFacebook ngabagqugquzeli balo mcimbi futhi noKhuzani Mpungose wakuqinisekisa lokho kanje "Sizwe sakithi, ngithi anginazise ukuthi ngeke sisakwazi ukuqhubeka ne-activation ebizoba kusasa eThekwini ngenxa yokudlula emhlabeni kukaNdunankulu wesizwe sethu KwaZulu. Usuku olusha lusazomenyezelwa ngokuhamba kwesikhathi. Siyabonga."
Lo mzungezo ubuzoba ngeSonto eThekwini Community Church ngo-9 ekuseni. Esitatimendeni sabo abasinameke ekhasini leGcwalisa Spring Picnic - All White babhale ukuthi lo mzungezo bawuhlehlise ngenxa yokuthi kusuke kwawa umuthi omkhulu.
"Uhlehliswe ngenhloso yokuhlonipha ukudlula emhlabeni kukaMhlonishwa uMntwana uMangosuthu Buthelezi... Usuku olusha lusazomenyezelwa."
Phakathi kwabaculi abebezonandisa kusasa bekubalwa uKhuzani, Dumi Mkokstad, Thinah Zungu, Malusi Mbokazi, Sebe Nzuza, Pastor Dennis Ntombela, DJ Happy Gal, Sizwe Mdlalose, Christ Worshippers Choir noDJ Ncane.
UShenge (95), ongumsunguli weNkatha Freedom Party, udlule emhlabeni ngezintathakusa ngoMgqibelo futhi izindaba zokudlula kwakhe zaqinisekiswa wuMengameli wezwe, uCyril Ramaphosa.