KUHLEPHUKA iteku namhlanje kuMbhaqanga Heritage Music Show eStable Theatre, eThekwini. Kuzoze kushone ilanga izihlabani zalo mculo zisina zidedelana kule ngqophamlando yomcimbi.
Kubaculi ababoshelwe kule ndumezulu kubalwa Ababekezeli, Abagandayi, Bonani Mhlongo, Oswenka, Mdabu Ngqulunga, Vusi Ngcobo, Abancengi Bempilo, Odali, Abangani, Abagijimi, Amabhungu, Msobompofu, Ozakwabo, Osbali Basemzini, Miya Brothers, Mzumbe Brothers, Njabulo Blose, Gudlugu, Bra Gee, DT Malembe, Thokozani Qoma, Ikhehla Elipheth' Isitayela, Amasoka, Maxakaxaka Nezihlobo, Joe MZ Nabasebenzi, Thokozani Zwane nabanye abaningi. Phakathi kwabazobe bephethe uhlelo kukhona abethuli bohlelo lomculo womculo wesintu ku-1KZN TV, uMadlokovu Ngema noHelicopter Ndlovu.
UBonani uthe abantu abafike ngobuningi babo bezozitika ngobumnandi balo mculo. "Inkulu impelasonto, akufanele abantu baphuthelwe."
UGudlugu uthe izithameli zizobhema zikholwe ngoba kuzobe kushikisha ufudu. Imali yongena emnyango nguR50.