UZIZWA ethobeke kakhulu ukuhlonishwa ngabesifazane ngothando uLinah Ebony Ngcobo owangenisa kwazwakala ngomculo wesiTsonga ngeminyaka yama-80’s.
U-Ebony nozakwabo uMercy Pakela bavezwe njengezingqalabutho zomculo ezizohlonishwa emcimbini wanonyaka weBasadi in Music Awards (BIMA) ozokuba ngoMgqibelo, ngo-Agasti 10, e-J’oburg Theatre.
Ngokusho kwabahleli balo mcimbi, laba besifazane balime indima enkulu ekwakheni imboni yomculo nokuhlahla indlela enhle ngokuzinikela ngamakhono ayo. Ngale kokusebenzisa amakhono okucula, bayaqhubeka nokugqugquzela nokukhuthaza abaculi abasebasha nabathandi bomculo.
Basebenzisa umculo ukulwa nezimo, abagcinanga nje lapho kodwa bashiye uphawu olungacimeki ngethalente labo nokuzinikela. I-BIMA iyababona laba besifazane ngenkathi beqhubeka nokukhuthaza nokuba nomthelela ezizukulwaneni zamaciko nabathandi bomculo.