ABANTU baKwaZulu-Natal banyelwe yinyoni esandleni njengoba bethole ingqayizivele yethuba lokuzitika ngomculo wezintandokazi zomculo ongasoze wabuna kwi-2nd Durban Soulful & Heritage Experience e-ICC Arena, eThekwini ngoDisemba 17 kusukela ngo-3 ntambama. Phakathi kwabaculi abazobe besina bededelana kule ndumezulu yomcimbi kubalwa uJudith Sephuma, Brian Temba, Ernie Smith, Themba Mokoena, Justin Lee Schultz, Billy Monama, Yommy Sax,Thobeka Ndlovu, Fanie Dick, Neo Moroka, Grooves Assorted nabanye abaningi.
Umgqugquzeli walo mcimbi, uSthembiso Dlamini weG-Mellowz Entertainment, uthe iDurban Soulfulful & Heritage Experience bekufanele yenzeke ngo-Ephreli 30 kodwa yahlehliselwa umhla ka-17 Disemba ngenxa yezikhukhula ezakhahlameza umphakathi waseThekwini namaphethelo. "Lo mcimbi uqale ukuzakhela ugazi ngo-2019 ngesikhathi ubophele izingwazi zaphesheya kwezilwandle uHoward Hewitt noKaryn White, ababeshiyelana inkundla noLinda Gcwensa noLucia Jakeni wodumo kuma-Idols SA," kusho uSthembiso.
Unxuse abathandi bomculo owulozolo ukuba basheshe baphuthume eWebtickets nasezitolo zakwaPick 'n Pay ukuyozitaphela amathikithi ngo-R250 ngenxa yokuthi isibalo sawo asidlulile ku-1000.
Esephetha uSthembiso uthe nakuba umcimbi uqala ngo-3 ntambama kodwa iminyango yase-ICC Arena izoqala ukuvulwa ngo-2 ntambama.