AMACIKO aseNingizimu Afrika ayisuthile induku kuma-African Muzik Magazine Awards (Afrimma) muva nje. KwiBest DJ Africa kwenzeke obekungalindelekile njengoba intokazi edabuka eSwatini, u-Uncle Waffles, iqumbe phansi ngisho nompetha kumaGrammy, uDJ Black Coffee.
UDBN Gogo, uMakhadzi, Msaki noShekinah bakhale ngaphansi okwentshebe yaKwaMashu kuTowela waseZambia, emkhakheni weBest Female Southern Africa UYoung Stunna unenebulwe wumculi waseNigeria, uGoya Menor kumunxa weBest Newcomer.
UZakes Bantwini ubhonywe emkhakheni we-Artist of the Year nguzakwabo waseNigeria, u-Asake. KwiBest Female Rap Act uNadia Nakai ushaywe nguFemi One waseKenya kwathi uBlxckie no-A-Reece bangqimuzwa nguPhyno waseNigeria. UMusa Keys ubengene emunxeni weBest Collaboration kodwa uthole imbibizane kuPheelz waseFinesse .UDJ Maphorisa akalibonanga elidlalayo emkhakheni weMusic Producer of The Year njengoba ehlulwe wuMagistick waseNigeria. UHope Ramafalo uhlulwe ngu-Uncle Azeez waseNigeria eqoqweni lwe-African Dancer. Abanye ababuye beshwiba izandla kulo mqhudelwano wezindondo ngoFocalistic noDlala Thukzin.
Nakuba kunjalo kodwa uMaster KG yena uwine umklomelo weBest Male Artist in Southern Africa.