OWADUMA ngokuba wumsakazi weGagasi FM, u-Ayabulela "Zola Zeelovin" Mhlongo, uthe nakuba umndeni wakhe washaqeka ngokulingisa kwakhe emdlalweni okuzitikwa kuwo ngocansi kodwa wakuqonda ukuthi uyasebenza.
UZola (26) udlala indawo kamakhwapheni obuye avele ezitika ngocansi nesoka lakhe. Uthe le ndawo ayilingisa kulo mdlalo, ayibanga lula ngoba bekungokokuqala ngqa empilweni yakhe evela enza umkhuba.
"Umndeni uyakuqonda ukuthi wumsebenzi futhi ngiyawuhlonipha umsebenzi. Ngaphandle nje kwalokho, lena yingxenye yohambo engifuna ukufinyelela kulo ezingeni lokulingisa.
“Njengomlingisi anginqindiwe ukuthi iyiphi indawo engifuna ukuyilingisa ngoba ngiwumlingisi obizelwe kulo msebenzi ngakho ayikho indawo engangehlula ukuyilingisa ngoba ukulingisa yikhono engisazicija ngempela kulo."
Uthe uyaqinisekisa ukuthi nanoma iyiphi indawo ayidlalayo uyazimisela kuyo ukuze akhiphe ubhozo.
"Ngiyayithanda inselelo ngoba inselelo ikwenza unganethezeki ngakho bekuba mnandi ukudlala le ndawo ebingiphonsela inselelo futhi kumnandi ukuthi ngiyenzile. Manje sengidlulela kwenye inselelo enkulu."
Kwenzeka lokhu nje, uZola ubuye alingise nakomunye umdlalo omusha ku-1 Magic osihloko sithi 365. Uthe kumjabulise kakhulu ukulingisa emidlalweni emibili ngesikhathi esisodwa.
"Kwi-365 ngadlula kwinhlolokhono amahlandla amaningi ngaphambi kokuqinisekiswa ukuthi sengiwuMasego. Ngijabule kakhulu ngoba sengibuyele ngezinkani kule ndima nokukhulisa igama lami ekulingiseni.
“Kuyangijabulisa futhi kuyangikhuthaza ukuthi ngenze okukhulu." Uchaze uMasego njengentombazane ekhululekile ukwenza umathanda futhi ephila impilo engenazihibe namibandela nokuzenzela imali. Uthe zikhona izinto ezifanayo phakathi kwakhe noMasego.
"Nami ngiyintombazane ezisebenzelayo nefuna ukuzikhulisa. Uyangigqugquzela."
Uthe ukudlala kwi-Adulting naku-365 ngesikhathi esisodwa kumbonisile ukuthi uma usebenza ngokuzikhandla nokungaphumuli, uyazuza ekugcineni.
UZola uqale ukuzakhela ugazi ngokusakaza uhlelo lwangezimpelasonto kwiGagasi iThe Friday Hangout iminyaka emihlanu ngaphambi kokudlulela kwithelevishini enza uhlelo oluthi Shay-iround kuSABC 1 nakuZalo, elingisa indawo kaHleziphi.
Ngaphandle kokuthandana nomculi, uPrince Kaybee, uZola ubuye wakhipha umucu othi Yamukela futhi benoPrince babusiswe ngendodana ngo-2021.
UZola ungusomabhizinisi okhiqiza izimpahla ezikubamba ngqi kwabesifazane, i-Undefined Shapes.