ISIHLABANI somculo kamaskandi, uKhuzani "Indlamlenze" Mpungose nozakwabo uScebi "Inkosi Yamagcokama" Dlamini, bakwiTop 3 kuma-albhamu angu-100 angungqaphambili kulezi zinsuku ku-iTunes kuleli. UKhuzani usaqengqeleza phambili ngecwecwe elisha alikhiphe izolo elisihloko sithi Umqhele Nethawula kanti Inkosi Yamagcokama ilele isithathu nge-albhamu ephume namuhla esihloko sithi Home Alone. Lezi zinsizwa zilandelwa ngemuva ngoMakhadzi, Boney M, Kwesta and Kabza De Small, Morda, Andrea Bocelli, Mandisi Dyantyisi, Adele,Ed Sheeran, Black Coffee, ColdPlay nezinye izingwazi zamazwe ngamazwe.
Ezingomeni ezishisa izikhotha kuleli kulezi zinsuku kwi-iTunes Top 100 Singles Chart, uKhuzani usangunombolo 14 ngomucu awuhlabelela ngokuhlanganyela noLuve Dubazane kanye noSphesihle Zulu, osihloko Umuntu Onengoma (Onengane).
UGatsheni ukunombolo 18 ngenoni elithi Yimi Umalume kanti uSkweletu ukunombolo 19 ngengoma eqokwe nakwiTop 10 yoKhozi FM, esihloko sithi Inja Endlini.
Zisaholwa phambili uRihanna ngengoma ecashunwe efilimini iBlack Panther- Wakanda Forever, esihloko sithi Lift Me Up. Isibili silelwe yiMyztro ngengoma ethi Tobetsa. Kube sekulandela uDJ Maphorisa& Visca ngengoma ethi Ba Straata, Soa Matrix& Mashudu ngengoma ethi Mina Nawe, Mas Musiq ngethi Sengizwile, Burna Boy ngethi For My Hand nezinye.