UMSAKAZI weGagasi FM, uFelix Hlophe ucacisa eyokubonakala kwezinsizwa abezithumile ukuthi ziyokhokha inhlawulo ziphethe nezimbuzi ezimbili.
Ekhasini lakhe kuFacebook, uFelix unameke abesilisa abencoma ukuthi bayakwazi ukuphatha izingxoxo futhi bafike baphumelela lapho ebebathume khona. Uze wathi bebengeke badabule ethumele lezi zinsizwa ngoba uyazethemba. Laba abavela kwii-video baphethe izimbuzi ezimbili okubonakala bevulelwa esangweni bemukelwa emzini othile abebezohlawula kuwona.
Yize kuke kwaba namahlebezi okuthi uFelix ubeyohlawula ekhweni lakhe “Elisha” ngenxa yokuthi umakoti “wakhe omncane” usekhulelwe, lo msakazi uthe akunjalo.
“Cha izinsizwa ebengizithumile beziyongihlawulela eNtuzuma lapho ngathola khona indodakazi kudala nesineminyaka engu-19 manje. Empeleni nginendodakazi endala engifuna ukuyenzela umcimbi wokuyikhulisa bese ngiyishintsha isibongo ibize esami. Angikakalunqumi usuku engizoyenzela ngalo umcimbi kodwa yinto ezokwenzeka kungekudala,” kusho uFelix.
NgoMeyi nonyaka kuke kwavela izindaba zokuthi uFelix, osakaza uhlelo i-The Uprising noMinnie Ntuli, uzoshadelwa yintokazi ebisiyishende lakhe leminyaka u-Ayanda Bhengu, ibe wunkosikazi wesibili emva kukaTracey Smith ongunkosikazi wakhe okhona manje. Le mibiko uFelix wayiphika walala ngomhlane wathi ingamanga aluhlaza cwe.
Nakulokhu uvele wahleka nje uma ebuzwa lokho, wathi useyazi ukuthi uma eke wathintwa abezindaba luvele lube ngundabamlonyeni udaba lwakhe.
Akafunanga ukuyiphendula eyokuthi umakoti wakhe omncane usezithwele kodwa uvele wakhala ngokuthi kukhona lapho engena khona wavala ucingo.
KwiHollywoodbets Durban July, uFelix ubonakale ehamba nonkosikazi wakhe uTracey uMaSmith.