SEKUQALILE ukuqoshwa komdlalo isizini yawo yokuqala eyaba nedumela kakhulu, iThe Herd.
NgoMsombuluko abanikazi balo mdlalo, iSariti Films bafake i-video ezinkundleni zokuxhumana bekhombisa abalingisi balo mdlalo, babhala ukuthi sebeqala ukuqopha.
NgoDisemba abakwaM-Net ohambeni ababememe kulo abezindaba baveza ukuthi isizini yesibili yeThe Herd iyabuya.
UReneilwe Sema wakwaM-Net waveza ukuthi imidlalo nezinhlelo ezenze kahle kulo nyaka bakhethe ukuzibuyisa.
“Umdlalo iThe Herd ngomunye wemidlalo eyenze kahle kakhulu, uqala ukubonakala kuMzansi Magic. Sizoyibuyisa yonke le midlalo abantu abakhombise ukuyithakasela nezinhlelo zakhona,” kuchaza uReneilwe.
Lo mdlalo kungenzeke ukuthi ubuye uma kuphela umdlalo okhona njengamanje othi, Ehostela.
Kwi-video efakiwe kuvela abalingisi abadala balo mdlalo okukhona kubo uWinnie Ntshaba, Sihle Ndaba, Cindy Mahlangu nabanye ababekhona.
Maduzane kulindeleke ukuthi aboMzansi Magic bamemezele izinhlelo ezintsha ezizobonakala ekuqaleni kuka-Ephreli.
Kuzona kulindeleke ezindala nezintsha ezingashaya ibuya kulesi siteshi.
Uhlelo, uThando Nesithembu ngolunye kwezinhlelo ezingase zikhuze ibuya kulolu hlelo ngo-Ephreli njengoba beluqoshwa ngonyaka odlule ngesikhathi uMusa eshadelwa ngamakhosikazi akhe amabili, uMaCele noMaYeni.