UZOFIHLWA kusasa umethuli wezinhlelo u-Angie Diale (55), obesezakhele igama ohlelweni iPlease Step In kuMzansi Magic.
U-Angie udlule emhlabeni ngoLwesine olwedlule, nokuvele izindaba zokuthi ubephethwe i-pneumonia.
Ngokwesitatimende esikhishwe umndeni, inkonzo yomngcwabo izoba sePimville, eGrace Bible Church, ngeSonto nayizolo bekunezinkonzo zokumkhumbula, enye ibisemzini wakhe kanti enye ibisehholo iCommunal Hall, e-Orlando East.
Umndeni wakhe esitatimendeni owasikhipha waveza ukuthi uMam Angie, njengoba ebaziwa kanjalo wakhala ngokunqanyukelwa umoya, wabe eseyiswa esibhedlela iTshepo Temba.
NgoLwesithathu wadluliselwa esibhedlela iLeratong Hospital nalapho ashonela khona.
Baveze ukuthi ushiye emhlabeni unina, umyeni wakhe nezingane zakhe ezimbili.
Isiteshi uMzansi Magic siveze ukuthi silahlekelwe kakhulu ngokudlula emhlabeni kukaMam Angie.
UShirley Adonis ongumqondisi wezinhlelo zakuleli uthe beyisiteshi balahlekelwe kakhulu ngokudlula kukaMam Angie emhlabeni.
“Ubengumuntu ohlale ekhuluma ngokuphila kwakhe negciwane leHIV, futhi ebuyisa ithemba emphakathini. Siyazwelana kakhulu nomndeni wakhe nabo bonke abalandeli bakhe kulesi sikhathi esinzima ,” kuchaza isitatimende.
I-SABC 1 nayo ikhiphe isitatimende njengoba nakhona ake wethula uhlelo oluthi Relate, nabaveze ukuthi badabuke kakhulu ngokudlula kwakhe emhlabeni.
Bathe uMam Angie ubengumuntu okwazi ukuhlanganisa intsha nabazali bayo nobephinde adale ukuthula emphakathini.
Ukushona kukaMam Angie kuphinde kwathinta nabantu abaningi kuleli njengoba bekukhalwa nxazonke emuva kokuvela kwezindaba zokudlula kwakhe emhlabeni.