UBAHLABE umxhwele umyalezo wenkosikazi yomsubathi wakuleli ohlonishwayo njengoba beqeda iminyaka othandweni labo.
ULedile Violet, ongunkosikazi kaCaster Semenya uzwakalise indlela azizwa ngayo emshadweni wabo weminyaka eyisikhombisa. Baneminyaka eyisikhombisa futhi iyalingana naleyo abathandane ngayo. Isiyonke iuw-14 iminyaka behlanganiswe wuthando.
"Kule minyaka ewu-14 sithandana, neyisikhombisa emshadweni selokhu unomusa, ufuna into eqondile, unjalo unothando nenhliziyo emnene. Ungumngani nomama oneso elibanzi ezinganeni. Ngikuthanda ngenhliziyo yami yonke," kubhala uViolet.
Lo myalezo uthole indawo ezinhliziyweni zabaningi ngoba abantu babahalalisele njalo. USemenya obegubha nosuku lokuzalwa uveze ukuthi wanelisekile ngesigaba abakuso empilweni. "Ngithokozile ngendlela esikhule ngayo kulolu hambo lwethu. Ngifisa siqhubeke nokuthandana, ukunakekelana nokuhloniphana," kusho uSemenya.
Iningi losaziwayo libathumelele nemiyalezo eyakhayo nebabongelayo ngokuqina kothando lwabo. Kuzokhumbuleka ukuthi uSemenya wake wabekwa amabala ngobudlelwane bakhe nonkosikazi wakhe. Bagubha iminyaka eyisikhombisa beshadile kanti sebebusiswe ngamadodakazi amabili.