KUPHELILE ukuqagela ngokukhulelwa kukasaziwayo wakuleli obekulokhu kungaqondakali noma amahlebezi okuthi uzithwele ayiqiniso yini. UDJ Zinhle ongunina kaKairo oyindodakazi ka-AKA usedalule ukuthi kuyiqiniso ukuthi uzithwele. Ngaphezu kwalokho ubuye wamemezela nezindaba ezimnandi zokuthi uzoba nohlelo oluthi yena.
Lolu hlelo lukaDJ Zinhle luzosakazwa kwiBet Africa ku-channel 129 ngoSepthemba 18. Lezi zindaba zifike abantu abaningi bezilindele njengoba bekulokhu kungacaci ukuthi ngabe ukhulelwe ngempela yini. "Ngiyazi akulindelekile kodwa ngijabule kakhulu ukunazisa ngengxenye yempilo yami. Ayibonane ngoSepthemba 18," kusho uDJ Zinhle.
Kuvela lezi zindaba nje abantu vele kade babekhuluma ngesoka lakhe ezinkundleni zokuxhumana yize uDJ Zinhle engayithi vu ekayise wengane. Kodwa ngakolunye uhlangothi uBongani Mohosana weBlack Motion owaziwa ngelikaMurdar Bongz ezinkundleni zokuxhumana ulokhu emthakazele njalo lo DJ. Laba yingane yabo yokuqala lena uDJ Zinhle ayikhulelwe nokukholakala ukuthi uzobonakala kulolu hlelo. Abalandeli bakaDJ Zinhle bazithakasele lezi zindaba bambongela ngokukhulelwa kwakhe. Useqalile naye ukunameka izithombe eziveza isisu sakhe ukuthi sesingakanani.