ZINGASE ziwushaye maduze komunye wezinkakha zabalingisi bakuleli owaduma kakhulu kwiGenerations. USello Maake KaNcube uveze ukuthi usecele ukushada nesithandwa sakhe uPearl Mpho Mbewe.
Lezi zithandani zamangaza abaningi ziphumela obala ngothando lwazo, emuva kwesikhathi esingatheni sezithembisene umshado.
Emasontyweni ambalwa edlule uSello waveza isithombe sakhe nesithandwa sakhe uPearl ezinkundleni sokuxhumana ngosuku ababehambele ngalo umgcwabo kaShona Ferguson.
USello uveze ukuthi usothandweni emuva kwesikhathi eside ekwamukele ukuba yimpohlwa.
Utshele abalandeli bakhe ukuthi usecele uMpho umshado futhi wangananaza wavele wavuma. "Nginethulela unkosikazi wami, uvumile. Sekuwuyena angizimisele ngokuphinde ngithole omunye," kusho uSello.
Eqhuba uthe ngesikhathi eyimpohlwa engathandani namuntu ubengenankinga futhi kuyinto ayemukele. Ukuba sothandweni njenga manje kuyinto emjabulisayo nemenza akulungele ukuthi akhulume ngempilo yakhe yangasese. Abantu balokhu bebabongele njalo kanti uSello naye ulokhu emkhumbuza uMpho ukuthi uyamthanda.
Amazwi amnandi nahambisana nemiyalezo yothando uwanameka ngisho ezinkundleni zokuxhumana ukuzwakalisa indlela azizwa ngayo ngoMpho. Mayelana nezinhlelo zomshado akukho ebesakuvezile ngosuku lwabo, kodwa muva nje osaziwayo abaningi babukeka beveza uthando lwabo ngoba sebezoshada maduze. Omunye wabo uDkt Musa Mthombeni ebeziwushaya kuye ngempelasonto nonkosikazi wakhe uLiesl Laurie ebesanda kumlobola.