INKAKHA yomculi we-jazz, uSelaelo Selota, izobhulela amazolo umculi waphesheya kwezilwandle, uJeffrey Osborne, ochungechungeni lwamakhonsathi ayo kuleli.
USelaelo uzoshiyelana inkundla noJeffrey Osborne kwiYou Should Be Mine Tour, ezoqala ngoMashi.
Yize uchungechunge luzoqala eGrandWest Arena, eCape Town ngoMashi 20 bese ludlulela ePietermaritzburg Athletic Stadium ngoMashi 24 kodwa uSelota uzonandisa kuphela eSuBet Arena, ePretoria ngoMashi 28 nase-Emperors Palace, eGoli ngoMashi 29.
USelaelo akadingi kwethulwa njengoba esezakhele udumo ngenoni lakhe elisihloko sithi Thrrr...Phaaaa.
Useneminyaka engaphezu kuka-20 eyibambile insimbi ishisa emculweni futhi useke wahlabana ngoxhaxha lwemiklomelo. Ngaphandle kwemisebenzi yakhe, ubuye wavelela ngokukhiqiza ulozolo lwe-albhamu kaJudith Sephuma esihloko sithi A Cry, A Smile A Dance noluthi Change Is Here.
USelaelo uthe ukujabulele kakhulu ukuthola ingqayizivele yethuba lokusina ededelana nale ngwazi yase-USA,ezakhele udumo emhlabeni wonke ngenoni elithi You Should Be Mine, Don't You Get So Mad nethi Stay With Me Tonight.
“Ngesikhathi umgqugquzeli walo mcimbi engimema ukuba ngibe ngomunye wabaculi abanandisa noJeffrey, kuthe angindize wukujabula njengoba kuyinqabakayitholwa yethuba leli.
Njengoba kuzobe kungokokuqala ukuba uJeffrey acule bukhoma kuleli, ngikulangazelele kabi ukumkhombisa ukuthi thina baculi baseNingizimu Afrika siphiwe kanjani nokumzwiswa isigqi saseMzansi. Ngikujahe kabi nokuba nesikhathi esimnandi nabalandeli bomculo wami,“ kuphetha uSelaelo.
UJeffrey Osborne ucashunwe yena ethi ukujabulele ukuzonandisa kuleli okokuqala futhi bekuhlale kuyifiso sakhe ukuvakashela eNingizimu Afrika, okuyizwe elinomlando omuhle kabi.
“Ngesikhathi ithuba liziveza, beyingekho indlela yokunqaba. Ngikujahe kabi ukuhlangana nabalandeli bami baseNingizimu Africa, ukubona nezwe nokuthi lingiphatheleni. Ngifuna abalandeli bami babe nomzuzu abangasoze bawulibala empilweni yabo. Ngibathembisa ubumnandi bodwa,” kuphetha uJeffrey Osborne.
Amathikithi okuthamela amakhonsathi kaJeffrey Osborne aseyatholakala eTicketPro.