UMFUNDISI wodumo ohlelweni lweTV futhi oyisishoshovu samalungelo amakholwa, uSolomon Izang Ashoms, ukhwele wadilika kuDJ Zinhle ngokukhuleliswa ngamadoda ahlukene engashadile. U-Ashoms uqale wagxeka uZinhle kwiTwitter ngaphambi kokumhlasela kwi-video ayifake kwiYouTube. Ugxekwa nje uZinhle usanda kuqinisekisa kwi-Instagram yakhe ukuthi ulindele umntwana wesibili amkhuleliswe yilungu leBlack Motion, uBongani "Murdah Bongz" Mohosana. Uhalaliselwe ngabantu abaningi, okubalwa kubo nokhulu wengane yakhe yokuqala, uLynn "Glammy" Forbes, ongunina womrepha uKiernan "AKA" Forbes. UZinhle no-AKA bangabazali bakaKairo Forbes.
U-Ashoms uthe akufanele atuswe uZinhle ngechilo lokuthola abantwana ekhaya. Uthe uyazi ukuthi osaziwayo abaningi bayakwenza lokhu ukuze bahlale besematheni emphakathini.
"Abantu abaningi bamhalalisele nabanye bebemjabulela. Mina ngiphume eceleni njengojosaka ngazitshela ukuthi ngeke ngikwenze lokho. Ngeke ngimbongele. Ngizojabulela ukufika kwengane. Ngeke ngimbungaze nje ngalokhu. Ingane yokuqala uyithole ku-AKA engashadile. Manje sekungeyesibili."
U-Ashoms, obuye abe yintatheli yezenkolo ehlale isohlelweni lweMoja Love, AbaBishop, uthe akaqondile ukumtshela ukuthi uDJ Zinhle aphile kanjani kodwa kuyilungelo lakhe ukugxeka isihlava.
"Unelungelo lokukhetha afuna ukukwenza ngempilo nangomzimba wakhe. Ngakolunye uhlangothi nami nginelungelo lokubeka umbono ngesimo esinjengalesi, ikakhulukazi ezweni elikhungethwe yinkinga yabesifazane abakhulelwa besebancane." Uthe lolu daba uze waludingida nomkakhe odabuka eDundee, okuyindawo eyakhelene neyakubo kaZinhle, iDanhauser.
"Nakhona kunenkinga enkulu yokukhulelwa kwamantombazane esemancane emphakathini avela kuwo. Uthandwa kabi futhi ulandelwa yizigidi ekhasini lakhe le-Instagram. Uphumelele futhi abantu babukela kuye. Angiqondile ukuthi u-AKA wamphoxa ngokumthembisa umshado kodwa wangamshada. Iqiniso wukuthi uyitholelani ingane uma ungakakulungeli ukuthola umntwana. Shada ngaphambi kokuthola umntwana." Uthe inkulumo yakhe kayiqondene nezinkambiso zeBhayibheli kuphela kodwa nesiko lesintu liyakuphikisa ukuthola umntwana ungashadile. Eziphendulela uZinhle kwiTwitter ubize u-Ashoms ngesiphukuphuku angeke achithe isikhathi sakhe eqagulisana naso.
"Ukuvumela ukuba ngiqagulisane nesilima kuzongenza isilima nami. Zikhethe izimpi," kushaya ngezimfishane uZinhle wodumo lwengoma ethi Umlilo.