UYAQALA namhlanje umdlalo wethelevishini obephele izilomo nokade ulindelwe ngabomvu. I-Angeliena ezodlala kwiNetflix ibophele osaziwayo okubalwa kubo u-Euodia Samson, Tshamano Sebe, Colin Moss, Kuli Roberts, Thapelo Mokoena, Nicole Madell, Marciel Hopkins, Schalk Bezuidenhout, Sandra Prinsloo noToya Delazy. Lo mdlalo kulindeleke ukuthi ubengeminye yemidlalo ezohamba phambili kubalandeli beNetflix njengoba ukhuluma nangezimo ezithinta impilo ephilwa abantu abaningi.
I-Angeliena iqondiswe u-Uga Carlini kanti kunanengoma eqoshwe neSony Music Afrika ethi Beauty of Africa eculwa uRefentse. IBeauty of Afrika isinane video eqoshiwe ithathwa nakwi Angeliena. UKuli ozodlala indawo kaTina uthe kuyamthokozisa kakhulu ukuba yingxenye yalo mdlalo kwazise ushuthelwe naseKapa lapho edabuka khona.
"Angikholwanga ukuthi ngizolingisa nabantu abanamava kangaka. Kuyangithobisa ukuba yingxenye yomdlalo i-Angeliena nokuthi uqoshelwe eKapa nami ngidabuka kaLanga,"kusho uKuli.
U-Euodia Samson odlala indawo ka-Angeliena uthe bekumele azifake ezicathulweni zakhe, acabangise okwakhe, nemizwa yakhe ihambisane nakuzwa egazini. Ukuze le ndawo ingene igxile futhi ibe yilento elindelekile, uthe bekumele azibeke ezingeni lakhe ngokwesimo sempilo nangakho konke akwenzayo.