UMCULI kaMaskandi unqume ukubathathela izinyathelo zomthetho abahleli beKZN Entertainment Music Awards, uthi babhala becisha ngemali athenjiswa yona ngenkathi enqoba emkhakheni ayeqokwe kuwo ngoDisemba.
UKhuzani Mpungose owadla umhlanganiso ngamavoti kumaqoqo amabili, okubalwa kuwo oweMost Loved owawuhambisana noR500 00 noweBest Maskadi owawuhambisana noR600 000, uthi ubematasa eqoqa ubufakazi abudingayo ngenhloso yokuthi abudlulisele kubameli bakhe.
“Ngabameli bami asebezobhekana nalolu daba. UJuni engathenjiswa ngawo, usushaye wadlula futhi abazihluphi nokuxhumana nami abahleli bomcimbi bachaze ukuthi yini ebambezela inkokhelo yami,” kubeka uKhuzani.
Eqhuba kafushane, uthe akasazihluphi nhlobo ngokubabuza ukuthi zihamba kanjani izinhlelo zokukhokhelwa kwakhe imali athenjiswa yona ngoba abahleli bomcimbi bathuli nabo.
Lo mculi wayebanga isicoco seMost Loved nosaziwayo abangaconsi phansi kuleli, okubalwa kubo uDJ Tira, Pearl Thusi, Robert Marawa, Sjava, Somizi, Nasty C nabanye.
Lo mcimbi wamaKZN Entertainment Award kwakungokokuqala ngqa uhlelwa futhi wawuseqophelweni eliphezulu use- ICC, eThekwini. Ukungakhishwa kwemali eyathenjiswa amaciko ahlonyuliswa kulo mcimbi sekuholele ekutheni iningi lawo lizwakalise ukukhathazeka ngokushona ezintangeni kwabahleli bomcimbi, abangacacisi ngemali yawo.
Ethintwa uMhlo Gumede mayelana nodaba, uthe uzokwenza isimemezelo kungekudala mayelana nalokhu.
“ Sizoqala ngokuxhumana namaciko kuqala ngaphambi kokuthi senze isimemezo,” kubeka uMhlo ngamafuphi.