USAZIWAYO wakuleli uKhanyi Mbau uthi abantu bazokwazi kabanzi ngokuthi kungani ebizwa ngeqola njengoba umlando ngempilo yakhe kuze kube yimanje uzokhonjiswa umhlaba wonke.
UKhanyi ungomunye wosaziwayo base-Afrika abazoqopha umlando ngokuba sohlelweni lokuqala lwempilo yabantu base-Afrika ukukhonjiswa kuNetflix.
UKhanyi ongumlingisi nomethuli wezinhlelo zikamabonwakude waduma ngokuthanda izinto eziwubukhazikhazi, uthi lolu hlelo luyinto enkulu kabi kuyena.
UKhanyi, Nadia Nakai, Andile Ncube noNaked DJ bakuleli, bazoba ngabanye bosaziwa base-Afrika abazokhombisa ngempilo yabo kulolu hlelo olusha kuNetflix iYoung Famous & African.
Kulolu hlelo, bazokhombisa ngokuthi basuka kuphi nempilo baze bafike lapho sebekhona manje.
UKhanyi uthe abantu bazokwazi ukuthi kungani abangani bakhe bembiza ngongqondongqondo ezintweni ezihlukene azenza ngokungesabi futhi aphumelele kuzo.
“Mina abangani bami bahlale bethi ngiyiqola elaziwayo ngakho abantu bazobona ukuthi kungani kushiwo lokho ngami.
“Lolu uhlelo bazoluthokozela njengoba lungeke nje lugxile kumuntu oyedwa kodwa kosaziwayo abehlukene. Okujabulisa kakhulu ukuthi lungelokuqala lwakuleli oluzobokala kuNetflix nokuyinto,“ kuchaza yena.
UKhanyi uzobonakala nosaziwayo bakwamanye amazwe e-Afrika okukhona kubona uDiamond Platnumz waseTanzania nowayengunkosikazi wakhe uZari wase-Uganda.
Umlingisi waseNigeria u-Annie Macaulay-Idibia noSwanky Jerry ongumkhangisi wakhona eNigeria.
Ngokwamazwibela alolu hlelo oluzoqala ngoJanuwari nosekuqalile ukuqoshwa kwalo, kuzoba uhlelo olulandela osaziwayo abasemikhakheni ehlukene lubheka ukuthi baphila kanjani.
Lolu hlelo bazoluqopha beseGoli, nalapho bezobonakala befuna izinto ezahlukene okukhona kuzo uthando nokwakha ubungani bebe beqhubeka nemisebenzi yabo yansukuzonke.