UMLINGISI wemidlalo yethelevishini, uGail Mabalane, uphume umkhankaso wokutakula indoda ebisebenza endaweni ababeqashe kuyo. Embhalweni awunameke ekhasini lakhe lika-Instagram, uGail uthe le ndoda ogama layo nguShadrack, ibanjwe ngabantu inkunzi maqede bayidubula emqaleni.
"Ngomunye wabantu abanomusa engibaziyo. Ekuqaleni kwale nyanga, ngezithuba zabo-5 ekuseni, elibangise emsebenzini, wabanjwa inkunzi maqede wadutshulwa emqaleni. UShad (okuyigama amteketisa ngalo uShadrack) udedelwe izolo (esho ngoMsombuluko) esibhedlela ... odokotela bathe usekhubazeke kwesingezansi. UShadrack waphuma ekhaya ezihambela ekuseni, wabuyela ekhaya izolo esekwi-wheelchair," kusho uGail oselingisa kwiBlood & Water.
Lo nkosikazi womculi wekwaito, uKabelo Mabalane, ube esenxusa nanoma wubani ukuba aphonse itshe esivivaneni emkhankasweni wakhe wokulekelela uShadrack.
"Yena nomndeni wakhe omuhle (okuwumkakhe nezingane ezimbili) badinga usizo. Kusukela osizweni lwemali (njengoba engasazokwazi ukusebenza) kuya kunoma yini engamsiza kulolu hambo."
Ezintweni azibalule njengesidingongqangi sikaShadrack, uGail ubale i-wheelchair ngoba lena asahamba ngayo uyibolekile, isihlalo, umatilasi, ukwelulekwa ngokwengqondo, ukulungiswa komuzi wakhe, imishanguzo nokunye okuningi.
"Ngiyacela uchofoze kwi-link esekhasini lakhe iBackabuddy mayelana nanoma yimuphi umnikelo. Ngiyabonga kakhulu futhi nibe nezibuziso," kuphetha lo mlingisi oke walingisa kwiRockville, The Wild nakwi Greed and Desire.
Kwenzeka lokhu nje, uGail usanda kuphumela obala kwiYouTube Channel ngesigameko esiholele ekulahlekelweni yizinwele kusukela ngo-2019.
Uthe imbangela kwaba ukushintsha isitayela sasekhanda ngokusebenzisa umuthi onamandla. Wayilahla ngokuyeka ayesesijwayele se-pixie cut eseyokwenza i-bun. Emuva kwamasonto wabe eselashelwa isifo esasimqothula izinwele. Abalandeli bakhe bamtusa kakhulu ngesenzo sakhe sokuveza imbungculu esidlangalaleni.