UZIMISELE ngokuvikela isicoco sakhe sokuba yibhokisa elingqimuza osaziwayo umrepha wakuleli uCassper Nyovest. Lo mrepha useqalile ukulokhu eshaya amazwibela enameka ama-video ezinkundleni zokuxhumana njengoba ezilolongela impi ephakathi kwakhe noNaakMusiq ngo-Ephreli 8, eSun City.
UNyovest uzethemba kangaka nje kulandela ukuthi esanda kuthela phansi umnikazi wesiteshi sakwiYoutube, uSilk Talk, ngoDisemba, nyakenye. Selokhu anqoba leyo mpi uNyovest libukeka liphezulu izinga lakhe lokuzethemba. Yize kunjalo, noNaakMusiq naye akazibekile phansi uyazilolonga.
Kuhlukene imibono kwiTwitter njengoba kukhona abathipha uNaakMusiq.
"UNaak kumele acuphe kahle ukuze ezogadla kanye kuCassper ngoba ngeke kube lula ukuthi yena afinyelele ebusweni bakhe," kusho uSwavey_Zondo.
Nabaseka uNyovest bathi bona babona ezosheshe awuqede umdlalo. "UCassper, asingabazi ukuthi uzomngqimuza lona," kusho uKhawula_Musa.
Lo mdlalo wokulwa kosaziwayo ubukeka ubathatha abantu abaningi okubalwa nabo osaziwayo abaphenduka abalandeli balaba abasuke bezolwa.