USEMEMEZELE ukuthi seluyagcina kuleli sonto uhlelo lwempilo yakhe umculi wakuleli ongaconsi phansi kwabaningi. UKelly Khumalo onohlelo iLife With Kelly Khumalo ekhonjiswa kuShowmax usebonge bonke abalandeli balolu hlelo waveza ukuthi kuzokhonjiswa isiqephu sokugcina. UKelly yize evelelisa kodwa kuzwakale engathi nakanjani akhona amathuba okuthi libuye libuye lolu hlelo luqhubeke nomlando ngempilo yakhe.
Isiqephu okulindeleke ukuthi sidlale yilapho uKelly ezobe evulela unina isifuba eveza ezinye zezinto ezingehli kahle kuye ngokwenzeka ekhaya. Yize amazwibela eveza yena nonina kodwa kubukeka sengathi bazodingida kabanzi izinkinga zomndeni. Ebhalela abalandeli bakhe uKelly ekhasini lika-Instagram, uthe osekudlulile uyaye angabe esazikhathaza kakhulu ngakho.
"Ngiyile nhlobo ethi uma isiwuvalile umnyango ingabe isabheka emuva, akukhathaleki noma ubani osemuva kwawo. Nibukele isiqephu sokugcina seLife With Kelly Khumalo, ngiyabonga ngokubukela kwenu kuze kube ngokuzayo,"kusho uKelly.
Abalandeli bakhe bachazekile yilolu hlelo babodwa ebebeveza ukuthi bathanda ukuthi lolu hlelo luhambisana neqiniso aluqoshelwanga nje ukukhangisa nokudonsa abalaleli. Osaziwayo nabo imbala babonakele bemhalalisela uKelly ngokuba yilo muntu awuyena. Umculi uWanda Baloyi ngomunye wabantu abaphumele obala waveza ukuthi uKelly ungomunye wabangani abasondele enhliziyweni yakhe.