UMCULI osafunda Grade 12 esikoleni saseNanda, uNaledi Aphiwe Myongwana, akakakholwa ukuthi ukhale wemuka nomklomelo weSoftnfree Afro Pop of the Year kumaBasadi in Music Awards, eJo’burg Theatre, eGoli, ngoMgqibelo.
UNaledi Aphiwe (17) uhlabane ngale ndondo ngengoma yakhe esihloko sithi Ngiyabonga, ehlula uKelly Khumalo wengoma ethi Emaweni, uLwah Ndlunkulu wethi Eyam’ noZamo (Kingdom of Eswatini) ngobengene ngengoma ethi Lendlela.
Lo mculi, ofunda esikoleni iKhethokuhle High kodwa osedume umhlaba wonke emuva kokusetshenziswa kwephimbo lakhe engomeni kaChris Brown ethi Shooter, ubonge kakhulu abantu abamesekile nenkampani exhase lo mkhakha ngokukholelwa ekhonweni lakhe.
Uthe akasahlehleli emuva kodwa usebheke phambili njengoba ezokhipha omunye umucu okulindeleke ukuba ashise ngawo izikhotha ngamaholidi kaDisemba osihloko sithi Ngifuna Wena.
Yize uNaledi Aphiwe abeqokwe nasemkhakheni we-Song of the Year kodwa akalibonanga elidlalayo njengoba equnjwe phansi intokazi esanda kuwina kuma-Grammy Awards, uTyla ngengoma ethi Water. Emunxeni we-Collaboration of the Year, uNaledi Aphiwe, Fezeka Dlamini noNomfundo Moh bahlulwe wuDJ Zinhle ehambisana noBasetsana ngengoma ethi Mdali.
Nakuba kunjalo, uNaledi Aphiwe uthe okunye okumjabulise kakhulu ukuthola ingqayizivele yethuba lokushiyelana inkundla nezihlabani akhule ebukela kuzo ezinjengoBusiswa, Nadia Nakai, Lady Du, Skye Wanda, Rethabile Khumalo nabanye abaningi.
Kwenzeka lokhu nje, nyakenye uNaledi Aphiwe uhlabane ngomklomelo we-Top Influencer of the Year kuma-2023 Briefly News Entertainment Awards.
“Ngibonga kakhulu kuNkulunkulu ngokungigada kwakhe nothando lwakhe. Ngifuna ukubonga kunoma wubani obe yingxenye yempilo yami. Nanoma yiliphi iconsi olwandle liyabalwa futhi angisoze ngakhohlwa ngabangisizile ukuze ngidlule ebunzimeni ebengibhekene nabo,” kubhala uNaledi Aphiwe.
KumaBasadi alo nyaka kukhonye kakhulu amaciko aseKZN anjengoMroza Buthelezi woKhozi FM owine i-Entertainment Radio Presenter, DJ Zinhle-DJ of the Year &Trailblazer, Lwah Ndlunkulu-Artist of the Year &Capasso Most Steamed Song, Brenda Mtambo-Songwriter of the Year, Shekhinah-Pop Artist of the Year noNontokozo Mkhize-Newcomer of the Year.
Abanye bakwezinye izifundazwe abaphumelele ngoThembi Seete-Best Styled Artist, Makhadzi-Best Dance Artist & International Achievement, Tyla-Highest Play, Zaza Mokhethi-Gospel of the Year, Kamo Mphela-Video of the Year & Amapiano Artist of the Year, Noni Khumalo-Entertainment TV Producer, Mercy Phakela-The Lifetime Achievement noEbony-The Lifetime Achievement.
AmaBasadi In Music Awards azosakazwa kwiSABC 2 ngo-Agasti 18 kusukela ngo-8.30 ebusuku.
