BADIDEKILE abalandeli besihlabani somrepha waphesheya kwezilwandle ovumbuke nesitayela sasekhanda esingaqondakali kahle. UKanye West usematheni ezinkundleni zokuxhumana kulandela ukuthi ebonakale kwenye yezindawo zokudla nesitayela sasekhanda esingacaci kahle okubonakala sengathi ubeshemulwa ngomshini wokugunda.
Ngokujwayelekile, ezikoleni umfundi wayebukeka ngale ndlela uma othisha bemugunde ngesikele, bese kuthiwa ushemuliwe ekhanda.
UKanye unameke lezi zihombe emakhasini akhe ezinkundleni zokuxhumana okubalwa nakwi-Instagram. Ubechazekile ngokwakhe ngendlela agudwe ngayo futhi ezibona ukuthi uphethe isitayela okudlula bonke abantu.
Abantu kwiTwitter bavele baphawula ngendlela ethi ayicishe ifane, beveza ukuthi badidekile kunzima nokuphawula bagxile kulesi sithombe. UKanye akazange abanake kakhulu noma akhombise ukuzwela ngabakushoyo kodwa uvele wanameka esinye isithombe wathi isitayela sakhe sibukeka kahle kakhulu uma sithwebulwe ngemuva nokuphinde kwaba ihlaya.
Yilapho abantu bevele bageza izandla, babodwa abathi mhlawumbe sekuyisikhathi sokuthi ashintshe indawo acwala kuyo ikhanda. Abanye bathi kumele nomuntu omgundayo athathe umhlalaphansi ngoba akenzi neze umsebenzi ogculisayo. Kuvumbuka lesi sitayela nje, uKanye ubesanda kuba sematheni ezimboze ubuso nomqala evele ngamehlo nokushiye abantu abaningi beshaya amakhala ezinkundleni zokuxhumana ngalesi senzo. Akukakapholi maseko usevele wagunda isiqothu sesitayela.