ADAYISA okwamagwinya ashisayo amathikithi okuthamela uchungechunge lwamakhonsathi akuleli engwazi yeR&B edume umhlaba wonke, uFreddie Jackson. Omunye wabagqugquzeli be-You Are My Lady South Africa Tour, uThulani Maphumulo weYonke Imizamo Productions, ukhuthaze abantu ukuba baphuthume ezindaweni ezidayisa amathikithi ukuze bengasindwa izinyawo.
"Ukuze abantu bagweme ukuphoxeka, kuzofanele bawathenge namuhla. Emasontweni amabili adlule, besinomcimbi eMgungundlovu, kuthiwa abantu ebebezama ukuthenga amathikithi bebehlangabezana nezimmbila zithutha ngoba bebetshelwa ukuthi asephelile ngenxa yokuhlulwa ukuhlela.“
Uthe abazohambela lamakhonsathi abalindele ubumnandi bodwa, okungubusuku obugcwele uthando nomculo omnandi. "Ngibe nenhlanhla yokuzibonela ngawami amehlo uFreddie Jackson enandisa eThe Forum eLos Angeles nyakenye. Engingakusho nje ukuthi abalandeli nomculo wakhe bazobhema bakholwe." UFreddie uzoqala eSun City Superbowl ngoSepthemba 23 no-24, adlulele e-Emperors Palace, eKempton Park ngoSepthemba 30 ngaphambi kokusonga imbenge eNkosi Albert Luthuli ICC, eThekwini ngo-Okthoba 1.
Ezingomeni okulindeleke ukuba uFreddie angaphumi esteji engaziculanga, kubalwa ethi Rock Me Tonight, You Are My Lady, All I Ever Ask, Have You Ever Loved Somebody, Tasty Love namanye amanoni.
Esephetha uThulani uthe amathikithi abiza uR450 kuya ku-R1125, eTicketPro, PayZone nasezitolo zakwaSpar kuzwelonke.
